Respondre als novèls jihadistas de l'occitanisme.

Es un bilhet escrit de faiçon independenta, o cal dire car lo verin de las abelhas pòt èstre dangierós.

Acabi de recebre, a l'amagat, un comunicat en francés -en francés- de l'IEO, Institut d'Estudis Occitans, e a la frasa -en privat- qu'ai recebut, dins la vrespada : Pas d'acòrdi per Occitània! Occitània es mai granda qu'aquò, e non vòli faire lo juèc dau Couleitiéu Prouvènço! Reinat, IEO 83. L'IEO sembla comunicar en francés per la premsa en francés, e en occitan per la premsa en occitan ; qu'es aquò coma actitud ? E m'imagini que devon saber escriure l'occitan bravament melhor que ieu, non ?

L'IEO –aital- pròva en emplegar lo francés que l'adreiça es clarament als elegits en plaça, o candidata en vista, aqueles/as que lor bailan las subvencions actualas ; es donc un mercejament clientelista, als amics e amigas socialistas que lor an fait signe recentament en parachutar directament dels burèus parisencs una provinciala, granda collaboratriça del govèrn del pòst-republican espanhòl e barcelonin Manolito Valse, ciutadana anciana de Comenge, e que, dins declaracions recentas a la premsa francesa, pensa que cal nommar la region Sud, aquela qu'es al nòrd de la Mediterranèa, coma Provença, Catalonha, Andòrra o Liguria ! Aquela candidata esperava pas una tal plega-esquina politic, vengut de l'IEO, associacion culturala e lingüistica, la futura mèstra de la delegacion de poder tolzan i trapa arguments pro utiles per obténer la seguida del clientelisme lingüistic.

Reinat fasiá seguir aital lo comunicat oficial dels jihadistas de l'occitanisme, l'IEO. Dins un comunicat anuèch nos informava que Occitània es una marca despausada per els (fasèm aital fòra Julius Cesear !), e que lo mot se podiá pas emplegar aital per una pichona partida del territòri, al Sud d'Occitània ; se fabrica una ideologia plan coneguda, l'etnisme lingüistic territorializat, la teoria de François Fontan qu'es estat talament criticat pels quites membres de l'IEO dins las annadas 1970. Personalament, e coma soi democrata, soi segur que, a la finala, s'acabarà de doás manièras : 1 / dictat francés o parisenc de tipe Sud de France, Roussillon-Sud, LRMP, tipe PACA o simplament Grand Sud. 2 / o aprèp un real debat dins una assemblèa novèla Sud-Occitània coma o pensi dempuèi la debuta e que la causa es pas estada pro clara pels engimbraires del collòqui del 4 d'abrial 2015.

Se cal recordar una frasa de l'ecologista Gérard Onesta, ancian vice-president del Parlament Europèu, a l'epòca, que, quora gausava parlar ailà, Brussels o Estrasborg, d'Occitània, l'interlocutor respondiá sistematicament, ont es marcat sus la mapa europèa ? L'IEO sembla vóler perseguir a l'escondon, per recebre subvencions de clientèla amiga segurament ?

Aital aprèp aver demandat a mantunes amics de respondre al questionari montat per France Bleu, una granda iniciativa jornalistica per totas las regions de fRança, e aprèp aver donat las meunas responsas qu'Occitània, estent dins la lista prepausada, respondiá a la question engimbrada pels jornalistas de France Bleu, Occitanie èra de la lista, ai donc respondut Occitània. Lo jornalista de France Bleu a pas encara vist la responsa passadista de l'IEO, exemple Lengadòc, la zòna fiscala del rei, ancian regime abans 1789 (agrada a Jean-Luc Mélenchon aquò!), ni lo biais Sud-Occitània pensada per mantunes a Tolosa, dempuèi la debuta, lo 4 d'abrial de 2015 (veire lo bilhet sul tèma pauc aprèp aquel data). Donc ai demandat de respondre en foncion de l'idèa de l'Internauta qu'a recebut lo ligam per l'enquèsta.

6 punts per respondre de manièra sancièra, a la frasa qu'ai recebut de tu, dins la vrespada : Pas d'acòrdi per Occitània! Occitània es mai granda qu'aquò, e non vòli faire lo juèc dau Couleitiéu Prouvènço! Reinat.

1 / Te demando pas de pensar coma ieu. Mas va veire la lista de prepausicions (France Bleu) e causiràs las francesas, pas las occitanistas. La decentralizacion es una delegacion del poder jacobin, res d'autres, es pas una construccion politica occitanista, ni de l'IEO.

2 / lo pantais occitanista que vòl un Occitània sancièra e acceptada per França, exista que dins lo cap dels Occitanistas ; cal veire la realitat del terrenh ; de creire que l'IEO es sus un nívol politic.

3 / Cataluña = província de España ; aquí frena pas per dire Catalogne per Perpinyà. E Païsses Catalans pels autres endreits de lenga catalana.

4 / Catalunya = Principat de Catalunya pels Catalanistas, o nacionalistas catalans, aqueles qu'agradan pas a l'IEO, quitament se son representants del pòble catalan al Parlament – çaquelà aquò de la politica lingüistica del Principat a plan ajudat per aver una politica lingüistica pels autres endreits de vivença dels locutors de catalan. La preséncia de la TV, o de ràdios, per exemple, mas cal notar tanben l'edicion, o la batalha pel catalan al Parlament Europèu. E tanben per l'occitan ! Se cal recordar 2006, coma data importanta.

5 / L'obsession Couleitiéu Prouvénço vos farà oblidar que i a dos elegits al CR de PACA (e n'avèm pas en Languedoc-Roussillon, e un dins cada autras regions administrativas francesas) e que la politica per l'occitan es çaquelà pichonèla, mas exista gràcia al Partit Occitan d'amics o amigas de l'IEO ; es pas la fauta del Couleitiéu Provènço, mas benlèu del biais de fargar una politica lingüistica pas pro clara dins lo cap dels occitanistas de Provença, e pas pro perseverents, justament. La question portava pas sul questionari de France Bleu, sul tèma : cal cambiar lo nom de la region PACA ? Senon, pichona region poblada, mas gròs problèma d'identitat entre la Gavotina, lo còr de Provença, la val de Ròse e la Comtea de Niça … lo debat se sauriá acabat per un «gardèm la PACA», intelligent, non ? Es de dire : gardèm l'estupiditat que nos arribèt de París ! L'avèm ganhat, l'avèm ganhat ....

6 / per clavar, lo nom de la region es un nom per una region administrativa francesa (que França n'a a fotre de las garolhas occitanistas, per contra defendre ton punt de vista farà que "Occitània" serà jamai presenta sus una mapa pendent un sègle de mai, sus las mapas oficialas ! IGN - e que las garrolhas donaràn arguments per devenir Sud de France, SDF, coma se lo fenomèn PACA vos agradava de nos lo mandar) ; quora disèm « Occitanie », fasèm pas de lingüistica, ni de nacionalisme occitan ; fasèm un acte de democracia, de dignitat epr Occitània, participèm al debat ambe mantunas responsas donadas per la populacion dins mantunes mèdias que lo president provençal de l'IEO o a segurament pas legit ; es de dire parlèm als ciutadans e a las ciutadanas que vòlon plan discutir sul subjecte, e que son de la region concernida (per un còp!) e pas en nombre redusit coma dins los clubs o recantons occitanistas.

Comprèni melhor perqué lo Couleitiéu Provènço a problèmas ambe los occitanistas de Provença... Mas aquò escrit, aquò vòl pas dire mon accòrd ambe lo movement politic aquel, ni ambe l'IEO, donc.

L'IEO es una associacion que viu de las subvencions dels CR -organismes politics d'una delegacion de poder del centralisme francés ; l'IEO jòga un ròtle cultural e lingüistic dempuèi sa creacion, plan, ara non vòl jogar un ròtle democratic dins los debats, e quitament s'i participa, nega d'i aver participat o ajuda los jacobins per imposar lo punt de viste politic que la populacion comprendrà pas. Es una associacion que nega als elegits dels CR e als ciutadans, e las ciutadanas, lo dreit lingüistic d'emplegar los mots que lor agrada, es un orgnaizacion que pòrta aital un messatge coma aquel dels jihadistas que fan tòrtas totas las semanticas e los significants emplegats dins Al Còran, per plan servir la causa associativa que son succeptiblas de portar, mas qu'ajuda los jacobins en region, pendent la campanha electorala de 2015.

Aquò me recòrda un « bon temps» que Robert Laffont, ancian president de l'IEO, refusava un bastiment bèl dins Montpelhièr perqué seriá estat un bastiment modèrne, d'un arquitècte de renomada mondiala tal que Georges Frêche lo pensava ameritar. L'egò del Georges Frêche non agradava dins un occitanisme de corta vista, e qu'en cinquanta annadas a sabut que fabricar garrolhas qu'an sonque agradat lo jacobinisme montpelhierenc e al delai aquel de la famosa granda Occitània, en ridiculizar aquel occitanisme letrat, e gaire politic, nimai democratic. Se l'«IEO Nacional» aviá acceptat l'idèa de Georges Frêche, lo sièti seriá reconegut mondialament, e quitament pels jacobins parisencs, e l'espaci a Montpelhièr seriá clar, puèi l'IEO seriá presenta realament a Montpelhièr, per organizar una manifestacion en davalada venenta.