13 novembre e aprèp, la paura fRança

Car lectors o Caras lectriças, avètz remarcat l'abséncia de bilhet pendent mai de dètz jorns. La rason la vau explicar ara.

Divendres 13 de novembre, un divendres e un 13, mantunes umans an decidat de cambiar la situacion politica de l'Orient Mejan en atacar la populacion parisenca, e matar dins una generacion parisenca qu'an la cultura en vista (restaurants, espectacles, sortidas del divendres, e fótbol se lo fótbol es cultura!) ; an tocat lo barri lo mai emblematic Parisenc, e l'estadi lo mai privilegiat dels Parisencs.

Aquel divendres, coma ai pas de television, èri dins un restaurant-pub De Danú a Tolosa, ambe un amic a beure Guinness ; es vertat, o cal notar, los Occitans son pas condamnats a fabricar una vida al entorn de l'article 75.1 del patrimòni dins lo qual la santa republica francesa nos vòl apartheidejar.

E divendres, perdon dissabte maitin, a las una ora, soi estat dormir ; mercés ai plan dormit car ai pus gaitar los mèdias parisencs.

Es a set oras del maitin, que lo despertar es estat … coma escriure... un pauc susprenent ; escoti una ràdio culturala qu'a pas la costuma d'èstre en live – coma o díson en patois parisenc- ; aquela estacion de Kulturé explica que «una fusilhada a matat ièr de ser» a Paris, especialament «dins endreits culturals parisencs, amai tanben a l'Estadi de França».

L'eveniment se debanèt pendent la difusion del partit Alemanha-França de l'Estadi de Sant Denís, capitala reiala del coronament francés. L'especialitat del De Danú es justament la difusion de BEEN Sport, TF1 (quora i a fótbol), France2 o France3 (quora i a rugbí), Canal Sport, BBC Sport, BT Sport ; avèm pas res entendut de l'atemptat, TF1 difusava e lo concènsus televisual sembla per els, oblidat de cridar sul teulat d'atemptats en directe. Es bon de saber pels jorns venents.

Francament, lo dissabte, e los jorns aprèp, al maitin, èri tristàs per la vida parisenca ; l'internauta podrà notar que la critica del sistèma parisenc (coma ai la costuma d'o far) es possible e lo dòl -per me- es estat una realitat.

Donc avètz aquí lo lògo qu'ai botat sus FB per signalar la meuna pagina (gaire son estat los que l'an reprès). Lo triste es per me, segon la civilizacion europèa, es pas lo roge, ni lo blanc, ni lo roge, es lo nègre ; sabi pas perqué mas es aital. Ai çaquelà tradusit lo lògo dels Nòrd-Americans que els fan pregàrias, coma dins las glèisas ; vertat que las religions son pas causa de violéncia, vertat non (!), e que pregar es segur la solucion (euurh, benlèu m'engani aquí, cal salvar lo torisme a Lorda).

Los pòbles d'una federacion d'Estats-Units qu'an votat per unes va-t-en-guerre -la familha Bush e lo conservatisme nòrd-american, los libertarians nòrd-americans- nos fan pregar per unes atemptats qu'an matat una populacion parisenca que pregan d'èstre coma els, imperialistas, vièlhs o novèls. Una partida de l'argumentacion dels djihadistas es aquí. E los aligats d'aquestes « pòbles d'una federacion d'Estats-Units » son los mai dobtoses dels aligats arabs qu'avèm ; se comprendrà melhor Israël, non ? Los amics dels amics son los meus amics … mas a l'Orient-Mejan quí amerita d'èstre amics dels democratas, pas los partits, mas los que son democratas ? Fasèm la lista per los eliminar, un aprèp l'autre, Iran (lo dictator es un religiós que fRança a albergat un temps), Iraq (lo dictator es estat deslogat pel poder conservator nòrd-american, e l'Estat pòst-colonial destrusit), Turquia (descendent de la destruccion de l'Estat Otoman, e installat sul modèl francés coma la Turquia modèrne, qu'ajuda a vendre lo petròli del Djihad terrorista de uèi), Líbia (Estat del dictator destrusit per l'occident e ara, es refondacion sus las basas abans la colonizacion italiana), Egipta (Estat arabo-ortodòxe que sobreviu gràcia a la perfusion financièra dels vesins), Aràbia Saodita (que la familha reiala es la mai granda manipulatriça dempuèi la fin de l'impèri otoman, e que lo 5000 membres son per d'unes, los mai grands financièrs del djihadisme, ambe l'ajuda dels pòbles d'una federacion d'Estats-Units), Koweit (devengut bravament mai suau dempuèi que l'Iraq l'a envadit, mas que las finança son monopolizada a finançar son Estat e la populacion, ara), Qatar (que la familha al cap es una granda sorga de finança per totes los terrorismes, o quitament lo fótbol de la FIFA, organisme plan conegut per «èstre clar» dins las seunas finança), Sudan (plataforma per dintrar en Africa, ambe la Líbia del Sud, mas qu'es plan conegut per son fondamentalisme islamic), Eritèa (Estat novèl e gestion distatoriala de la vida del pòble, sorga de migracion cap a Euròpa), Sud-sodan (Estat novèl en guèrra civila, cristian e qu'a aital fabricat una novèla sorga de migracion per fugir los dangièrs de la violéncia de la guèrra), Ièmen (Estat fondat recentament e que la fusion a fabricat una guèrra civila, e que lo vesin d'Aràbia Saodita manipula), Etiòpia (Estat lo mai paure d'Africa), Somaliland (Estat non reconegut, basa de la piratariá sus los fluxes dels batèus mondialistas que fan los ligams entre Àsia e Euròpa), Somàlia (Estat en guèrra ambe l'islamisme radical), Aràbias Units (Estat pauc democratics que vívon ambe vesins pauc democratics), Bahrein (Estat que la familha que regna es d'una secte islamica diferenta del pòble, aquí i a una guèrra de religion potenciala), Chipra (Estat de l'Union Europèa, jà divisat en dos gràcia a l'expansionisme de la laïcitat violenta turca), Paquistan (Estat que fabrica l'integrisme religiós, e participa a la guèrra contra l'Afganistan, Estat nuclearizat), Afganistan (Estat farlabicat pel colonialisme anglés, destrusit pel comunisme, puèi per l'islamisme, puèi per la politica del Bush), Síria (Estat farlabicat pel colonialisme francés e anglés, destrusit pel dictaor local), Líban (Estat farlabicat pel colonialisme francés, destrusit per mantunas guèrras civilas e l'emplec d'aquel coma sopapa dels problèmas d'Israël), Jordània (estat farlabicat pel colonialisme anglés aprèp aver creat Israël), Israël (Estat creat aprèp la catastròfa europèa organizada pel nazisme, l'extrèma-dreita europèa).

Síria e Iraq son al centre de l'installacion dels problèmas fabricats pels Europèus. E Rússia, aquel Estat dit federal, oligarquia politica modèrna fondada sul estalinisme e lo tsarisme que se vòl blanca e ortodòxe, i pensa integrar la seuna patz russiana.

Avèm aquí la fotografia de las causas que fan dels atemptats gropats de París ; una granda partida de la populacion parisenca es donc directament concernida per la colèra dels djihadistas.

Donc aquel dissabte 13 de novembre, ai plan comprès qu'èra la debuta d'una novèla guèrra, coma la meuna grand-mair o pensava a l'intervencion euro-americana en Iraq al moment de l'invasion del Koweït, 30 ans abans. Estranh o faguèron pas quand Rússia a invadit Crimèa...

Mas aiçò es pas tot. La populacion dels djahadistas es plan coneguda en fRança, es formada en fRança jacobina dempuèi quaranta annadas (generacion aprèp generacion), e mai, car lo problèma debuta pas ambe la fin de la guèrra d'Argèria ; lo problèma es ontologic a las basas ditas democraticas francesas, car la libertat, l'egalitat, la fraternitat qu'ai legit aquí :

Aquel concepte pron francés me faguèt plorar … e confirmar los potencials d'avuglament dels Parisencs sul tèma de la santetat Parisenca. Non los Parisencs son pas sants dins aquel afar, son inocentàs, avuglats, endoctrinats sense saber coma fan per acceptar aiçò.

Car de libertat d'èstre occitan, es de dire liberta d'èstre diferent que la nòrma imposada pels Parisencs, aquela libertat es sancierament nulla. Car l'egalitat d'aver una lenga occitana a egalitat de la Parisenca, aquela egalitat es nulla, car la fraternitat quand serà plan etiquetat occitan per un Parisenc, aquela egalitat es nulla. E los Occitans supòrtan lo dictat parisenc, en forma d'arrogança, dempuèi sègles.

Dissabte sul pic la colèra meuna puja :

mas se gaitarà dins un miralh o pas ?

Puèi arriba sus FB la confusion que fabrica la sotmission francesa, parisenca ; FB es un miralh coma un autre ; La Marseillaise e la bandièra francesa (aquela de La Terreur) arriba dins la carrièra puèi sus FB ambe la bandièra per las illustracion dels pseudòs ; ai suprimit aqueles qu'an botat aquela bandièra, bandièra qu'es la basa del problèma qu'avèm d'èstre democratas dedins l'Estat francés.

Pauc an difusat aquò, mai natre :

 

D'autres se son sovenguts de (quitament se l'Islam es pus realament lo problèma mas puslèu un instrument per installar la violéncia, coma sempre fan los apostats d'una religion sanctificada, dins un libre, una barba o un vestit en forma de preson) :

Aquí per l'extrèma-esquèrra soi devengut islamofòb !

E ai difusat aquel tèxte, que sembla pauques legiguèron quand los ai suprimit de la lista dels « amics » ; ai aital suprimit sus 3800 «amics», 300 «amics», mai-que-tot los darrièrs elegits encara en lista, mai tanben d'autres mai susprenents (coma un fum de Catalans que pensan en Francés quand fan la revolucion pacifica d'independéncia de 2015, o Calandreta a Niça, per exemple).

Puèi lo diluns 22 novembre 2015, arriba la confirmacion : «nous sommes en guerre», clar que per defendre un modèl qua fabrica falhidas, es segur que val melhor portar una guèrra que potingar las falhidas del sistèma, e las dicutidas dels intellectuals de fRance Kulturé, totes apasturats pel sistèma en plaça, non podrà resòudre lo problèma farlabicat mondialament per la planèta ; aquí, anuèch, per la guèrra se traparà moneda e deficits bons, per la guèrra !

Avèm aquí la fotografia d'Estat que son bastits sus la violéncia d'Estat ; aprenèm que los djahadistas an trapat albergament en Belgica, lo primièr fabricant europèu d'armas a mans per las guèrras africanas, las armas que frabícan la migracion que castiga l'extrèma-dreita francesa ; E podrai sul pic trapar que fRança es pas melhor per la venda d'armas. Caldrà esperar -pels sordats occitans que son sul batèu francés en fàcia Síria e Líban-, que LA mecanica foncionarà plan e tombarà pas en pana, la sindròma Maginot.

Ara, podèm pregar que lo dieu dels sordats los salve, mas de qué ? De l'enemic dangierós, mediòcre, en fàcia, o del sistèma ontologic que los paga per anar a la mòrt ?

E coma ai dit ièr, ara, alara qu'aquò èra esperat dempuèi 10 ans a Tolosa, avèm las intervencions de polícia per liberar los territòris de Tolosa que l'Estat francés a daissat desvolopar lo djahadisme francés, a Sopatard, Reignariá (via una mosquèa), Bèlafont, los Isards, Bòrda-Nèva (lèu?) : passarai entre las balas de pistòlas belgas o russas; Es que devèm encara far fisença a-n aquel Estat per justament li far plaser en cantar La Marseillaise e bandir la bandièra de La Terreur ? (aiçò parier a cada cementèri que lo concepte que lo fabrica mata la populacion, los 11 de novembre o 8 de mai)

Per lor far plaser benlèu en lor cantar una autra cançon patriotica, Lo Se Canta, La Copa Santa, o benlèu aquel tèxte ancian :