problèma dels professors, saber comunicar

Los professors d'universitat an un sampitèrne problèma, se sembla, sábon pas comunicar per las associacions que ne son los gavidaires. Aital ai recebut aquel paperòt (en francés) dins una revista tot en occitan !  Mas lo problèma es pas la lenga emplegada, lo problèma es .... (trobatz), e ai la solucion de l'interès del document, aquel document l'indica pas ! Quin temps perdut gràcia als professors d'universitats francesas en Occitània. 

Aquel document me dona lo dòl al cap

Per vos ajudar a melhor entendre aquel mal de cap, l'ai virat al revèrs !

Se trobatz perqué aquel document es important per l'occitanisme o per Castèlnaut d'Ari, vos demandi d'o notar en comentaris (ai la solucion ... ai telefonat non pas a l'associacion que lo cap redactor de la revista ne sap res, mas pas melhor a l'ofici de Torisme de la vila mençonada) ; ai la solucion perqué m'a calgut telefonar al teatre concernit, ont se debanarà las « journées d'Études » !  Vos demandi dins los comentaris, mai de previsions....

Son pas per saber coma se fabrica la non occitanitat del mètro linha 3, nimai la linha de fabrica d'AIRBUS o d'ATR, mens encara de saber que son las nanotecnologias, ni l'urbanisme a Castèlnaut d'Ari. E çaquelà lo cònsol a reservat aulas per una setmana de commemoracion.

Podètz tanben reservar las datas 8 e 9 de decembre per las « journées d'Études » misteriosa, mas las datas son encara pas pro claras, car se debuta quicòm lo 4 de decembre 2017 a Castèlnaut d'Ari sus aquel meteis foscós document.

Lagasnerie : dins un monde maissant

Geoffroy de Lagasnerie aurà agut la meteissa escasença qu'en Cornelius Castoriadis, me despertar al mièg de la nuèit ambe las causas qu'explicava a l'antena d'una estacion d'Estat, programa de radio parisenca. E ne soi estat grandament satisfait.

farai un bilhet per un libre en francés ! Vesètz que l'enbarrament es plan la societat francesa ; avètz jà vist un bilhet de literatura per una causa editada en occitan dins un programa de TV de lenga francesa ?

Quand se fabrica publica la cultura se farga un acte politic, assegura lo jove sociològue e filosòfe parisenc ; aquel regionalisme de la pensada parisenca m'agrada. Vertat que la pensada parisenca es sistematicament regionalista, perqué ? De diversitat ne veson sense qu'al pè de la vièlha paret de la santa capitala (a la sortida de periferic), dins la dita banlèga, lo regropament de populacions de totas las migracions pòst-colonialas republicanas francesas.

 

E quand lo monde exterior farga una praxis, una sapiença collectiva e escolastica, d'enbarrament sus se, que aital frena la circulacion d'una pensada diferenciada, la causa de la collectivitat dèu èstre desfugida per bastir una autonomia de la pensada - confirma lo jove filosòfe-sociològue francés. Encara una causa que l'occitanisme farga cada jorn sense res demandar a Paris (dempuèi las annadas 1950), e que Paris, en li refusar la preséncia fòrta e digna de la lenga dins las universitats o dins la vida viventa de la societat sancièra, assegura per la pensada occitana l'obligacion d'èstre autonòma dins una societat òrra (sempre nacionalista francesa) per poder normalament pensar coma Occitan, e non pas sotmetut a la pensada republicana e d'universitats, o de l'edicion academica francesa.

Es una responsa clara a totes los universitaris de l'escòlas francesas que fan d'ensenhament de l'occitan e qu'assegúran que fau pas far de politica ! Me sembla qu'es donc una legida obligatòria per totes los estudiants per l'ensenhament de l'occitan.

Mai o mens traparètz lo bilhet oral disponible sul site de Ràdio Lenga d'Òc de Montpelhièr.