Acabi de recebre la revista del Conselh General de Garona-Nauta (Comenge, Varossa e Tolosa), soi content d'apréner qu'un delegat a la lenga occitana es estat nommat, e que las ancianas politicas seràn contunhadas. Fautava pus de far coma lo FN a Oranja o Besièrs, e las abandonar !
Bon, mas çaquelà, mantenir es pas sufisent, cal benlèu ajudar clarament las associacions a se far conéisser, mas benlèu tanben a l'administracion de la decentralizacion de s'amanar de l'occitan, e l'oblidar pas dins las accions de cada jorn :
- signaletica, per totas las rotas del departament e collègis, e dedins lo Conselh General (coma per exemple en Pirinèus-Atlantics o Pirinèus-Orientals, o Peirigòrd).
- escambis economics (emplegar l'occitan per las relacions amb Catalonha), toristics (Comenge, Corserans, Varossa), sanitat (Comenge).
- crear una dinamica per escambiar melhor ambe Aran, e puslèu la deputació de Lhèida.
- participar a l'elaboracion d'una carta lingüistica per integrar l'occitan dins lo novèl pargue dels Pirinèus en Varossa e Comenge.
- installar l'occitan dins los busses del departament, per ajudar als corses d'occitan dins los burèus e mediatècas del departament.
N'i a pro d'aver l'occitan cantonat a la pagina CULTURA.
Quí non a explicat quantes còps als candidats aquò ?
Donc dins aquela pagina s'espèra pas sonque «los Occitan parlan als Occitans» (ai servat aquela majuscula a Occitan, un pauc coma los redactors politics de la revista, e espèri un jorn que la majuscula desapareisserà e que la politica per l'occitan serà naturala), mas una determinada politica que farà que l'occitan serà present jà en primièra pagina de la revista del departament. Benlèu per aiçò far, cal un foncionari dinamic, bolegadís, perturbator, implicat, benlèu pas de las letras occitanas o de l'universitat francesa de letras, per desvolopar aquela dinamica politica reala ?
Ah per acabar, lo Conselh General organizarà lo seu bus per anar manifestar a Montpelhièr ?
Cap comentari:
Publica un comentari a l'entrada