L’expression francesa «service public» es una expression vergonhosa quora se parla de la SNCF-RFF. Dempuèi 1936, la nacionalizacion de la «Compagnie du Midi», sabèm que l’entrepresa d’Estat, SNCF, ara SNCF-RFF, es pus al servici del pòble d’Occitània.
Prendre lo tren SNCF es tota una aventura comerciala, mas degun se pausa la question de l’utilitat d’aver la SNCF, alara que la SNCF es lo real problèma per desvolopar los servicis al pòble occitan en Lengadòc e Provença.
I a un motlon de ciutadans que se pausan la question de la complexitat per èstre client de la SNCF. Ai, donc pendent tres jorns, poscut verificar un còp de mai las incoëréncias del sistèma comercial SNCF dins l'Estat francés, e de sa manca sancièra d'eficacetat dinerièra, e de plasença per préner lo tren, sense cauma sindicala e sense problèma d’aiga per la circulacion.
1/ prendre lo TER per de las distanças cortas me sembla una causa que la SNCF non vòl desvolopar. Aital arribat a Nimes, bon client SNCF, ai crompat dos bilhets, Nimes/Besièrs qu'ai emplegat dinca Montpelhièr, e donc coma soi pas estat a Besièrs, ai perdut lo còst del bilhet de Montpelhièr a Besièrs. A Nimes, coma un bon client, ai crompat lo bilhet Besièrs/Avinhon en reduccion setmanièra, mas coma soi pas estat a Besièrs, lo quite jorn ai volgut me far transformar lo bilhet ; sembla que lo cerbèr a la pòrta de la botiga de Montpelhièr (novèla gara de mèrda pels ciclistas), m'a explicat d'un biais-me-fasètz-cagar-ambe-aquestas-demandas-impossiblas, que la clientèla es pas plan venguda quora paga son bilhet normalament.
2 / ai la carta de reduccion de la region Lengadòc-Rosselhon (que díson fins ara), e a Avinhon, es impossible d'aver un bilhet ambe la reduccion alara que la destinacion Avinhon TER es indicada sus la carta d'aquesta region administrativa francesa ; quí fabrica frontièra ? Senon lo sistèma administratiu e comercial de las entrepresas d'Estat ? Mas se pòt pagar ambe la carta de crèdit, causa que refusa per aver un biais de protestar contra lo sistèma bancari.
3 / dins aquesta quita gara, pels estrangièrs, sistematicament (per l'aver constatat dins mantunas garas), los estrangièrs se lor presenta jamai las reduccions dels CR … e donc an una impression de caretat dels bilhets de tren ; çò qu'es una realitat comparat ambe los sistèmas vesins ; la clienta italiana auriá poscut demandar la carta de reduccion de Provença-Alps-Còsta-d'Azul, e lo còst del bilhet auriá estat 50 de cent per anar a Ais-de-Provença (jà a 50 de cent es car !). Ai vist tanben d'estrangièrs, provesidor de CA pels comerçants occitans, mal tractats per un sistèma un pauc òrb dins las estacions de Narbona e Tolosa, impossibilitat de prendre un bilhet ambe las cartas de crèdits americanas (a Tolosa-Matabuòu), impossibilitat d'entendre los dos tipes de maquina per reservar un bilhet ; non francament, los clients estrangièrs son mal tractats en Occitània, per una entrepresa francesa d’Estat, un servici contra lo pòble occitan, coma aisina que destrusir lo plaser dels toristas d’emplegar lo tren.
4 / per anar a Nimes, la gara de Tolosa m'a indicat en partir qu'i aviá sonque un TER dempuèi Tolosa, causa qu'èra totalament faus. Es pas lo primièr còp que verifiqui que Tolosa Matabuòu es pas al nivèl comercial que cal, per rason d'ignorança o d'informacion, redusida bailada pels computers SNCF.
5 / e per completar lo tablèu dels problèmas franceses –SNCF RFF- en Lengadòc e Provença, i a aquela publicitat :
Aquí se vei que la representacion politica de la decentralizacion a pas gaire poder, contra lo mercat-Estat-nacion de las arrogantas entrepresas de «service public», qu’an lo poder directament de l’Estat. Es parier per l’universitat en Occitània.
I a urgéncia de crear una entrepresa de servici al pòble occitan, per aver servici realament al servici d’Occitània e de totas las populacions.
-°-
Cap comentari:
Publica un comentari a l'entrada