lo dreit republican francés aplicat ?

Cada vagada que se parla de la lenga occitana e d'una politica per aquesta lenga en dangièr, la lei de la santa republica es cridada... E quand los amics an besonh de manièra urgenta de desvolopar un projecte ligat als espòrts, la santa lei republicana es pas respectada coma tot ciutadan de Tolosa auriá de respectar.

Aital, lo president del Conselh Territorial de Garona Nauta explica dimarç passat que cal esperar la benediccion de l'Estat per subvencionar un Collègi Calandreta. Dins la quita aula de l'inauguracion, donc audible, lo co-president de Calandreta explica que Calandreta a mestièr d'ajuda dinerièra principalament abans aquela acreditacion...oficiala francesa. «Es la lei» republicana, explica lo president del Conselh Territorial de Garona Nauta.

Sabi pas grand causa sus l'afar Jean-Pierre Rives, que dèu èstre un grand amic politic dels politicians en plaça, car el, a obtengut -contra la lei republicana en plaça- una possibilitat de desvolopar un sistèma economic ligat a l'Euro2016 de fótbol.

Ah se Calandreta èra un club de fótbol, benlèu que ... la causa aniriá mai aviat.

Ah se Calandreta èra una riba de Garona, benlèu que ... la causa aniriá melhor ?

Ah se Calandreta èra un ... mas es sonque un biais de pensar liurament, benlèu aiçò lo problèma pel sistèma politic jacobin en plaça ?

Ah se las escòlas de Tolosa, escòlas de l'Estat, èran respectuosa de l'ensenhament de l'occitan, sus Riba de Garona o dins la plana d'Èrs e de Garona, l'occitan seriá pas ensenhat a mai de 7 % de la populacion.

Mas aquí ont i a mestièr d'una accion politica reala, sembla que lo politic tolzan es absent, o pas pro volontari, quand se tracta dels amics, la causa es diferenta... 

(detalh, èra parier ambe la color politica diferenta).

Ai entendut dire que los sobeiranistas de dreita, la companhiá tolzana e politica del Dupont d'Aignan, an dificultats de comprendre l'interès de l'occitan; sembla per la guingeta o palhòla tolzana d'en Jean-Pierre Rives, l'argument es mai aisit d'entendre, e an plan comprès l'urgéncia de l'accion politica sense respectar la lei republicana que sábon d'un autre latz aplicar per Calandreta, o per l'occitan en general...

Quand l'interès politic es grand, se sábon engatjar per non pas respectar las leis santas e republicanas.