L’Estivada, 20 ans, e mens 15.000 €

La subvencion del Conselh General de l’Avairon es estada demesida de 15.000 € en comission permamenta. E aquò, se faguèt la setmana de L’Estivada 2013. E los organizators ne son pas estats assabentats ! Es de dire que seriós lo Conselh General de l’Avairon pròba que l’es pas.

Es evident que vist lo nivèl de finançament de L’Estivada, lo 15.000 € se podrián trapar endacòm mai (soscripcion publica per exemple). Mas simbolicament es fòrt, fòrt maladreit de la part dels elegits del Conselh General d’Avairon, Aquesta manifestacion adralha mai de monde que cap autra manifestacion de Roergue. Es maladreit perqué del costat visibilitat de l’occitan, lo meteis Conselh General fabrica pas una òbra de las grandas, per exemple lo site Internet, preséncia de l’occitan, egal ZÈRO ! Dins la signaletica qu’es del seu ròtle per esséncia, podèm dire qu’es absenta en lenga occitana (parli dels panèus d’orientacion, los panèus de las rotas, benlèu que los cal pintrar de nègre coma en Iparralde o Bretanha, per i arribar ?) ; e soi segur qu’i a renovelament de panèus d’indicas mai sovent qu’i a un discors oficial per las inauiguracions.

De mai, se los 15.000 € son elevats a la linha costumièra occitana, podèm dire qu’es una ataca clara contra lo pauc que lo departament ajuda a l’occitan, e plaçada al moment mediatic que cal.

Seriá estat plan mai astruc de presentar aiçò d’un autre biais, mas sembla que los elegits de l’Avairon son pas pron aluzerpits e qu’an pas encara dimensionat lo resson mediatic qu’a fait l’anóncia d’aquò.

S’i aviá una rason de mai per desvolopar una politica sense los departaments, lo Conselh General d’Avairon acaba de portar una publicitat de las grandas sul manca de seriós d’aqueste departament, e benlèu d’una granda partida dels departaments d’Occitània, qu’an pas encara mesurar lo mal que fan cada jorn contra la lenga occitana, de l’Avairon, a l’Òlt-e-Garona, per donar los dos que sabi ; mas la lista es talament longa, que podèm confirmar, per l’occitan, los departaments deurián èstre utiles e zo son pas.