Egalitat republicana entre òme e femna, la solucion

Vòli pas dintrar dins los corredors judiciaris e complicats (mal financiat) de la santa republica francesa, mas i a urgéncia de reforma.

Dedins lo sistèma republican francés, sembla complicat d'aver l'egalitat entre los sèxes per aver elegit de cada sèxe, elegidas de cada sèxe. Ai trobat la solucion, en 5 etapas seguras (ai pas gausat far coma Dieu ne trobar 7).

Coma l'Estat francés a la costuma de l'inegalitat republciana per las lengas e sobretot la constitucionalitat de l'inegalitat lingüistica aquelas etapas seràn aisidas de plaçar : 

La prepausicion es estada mandada a la feminista del POC, Martina Boudet, per una discutida urgenta e per prepausar aquò a la campanha electorala de 2016.

1/ supression del Sénat e remplaçar per un assemblèa de femnas.

2/ eleccions per las femnas (amb velh o pas) e eleccions per òmes (amb cintas de castracion obligatòria o pas).

3/ lo parlament jacobin que mesclarà las doás assemblèas serà filmat coma la TV realitat. Lo public decidarà qui ganharà lo poder jacobin en votar per intellectual-net... sus un telefòne pagant per finançar los deficits.

4/ obligacion constitucionala e finala, creacion d'un govèrn dels deputats (sense possibilitat de reemplçament dedins l'emicicle, dobla foncion sense pagament suplementari) e a paritat, obligatòri.

5/ supression de l'eleccion presidenciala. Remplaçat per un directòri ... de nombre par... mas que lo cap cambia cada mes, amb una alternança femna/òme e lo president de la còlha republicana aurà dos vòts en cas de blocatge. La designacion del directòri se farà pels elegits al Congrès.

Excusas ai fait al pus simplàs en oblidar los transgènes, bisexuals, gais e lesbianas, e tanben los cargats de compte al Panamà.

Tot constitucionalista podrà verificar, es una inovacion que quitament los regimes iranian, indonesian, afgan, iemenita, arabic, an pas gausat installar per separar los òmes e las femnas dins lo mètro o dins lo Parlament, ni los «democratas» dels regimes ISIS.

Una granda partida de las idèas republicanas francesas son estadas panadas en Occitània, donc me sembla normal de fabricar aquela prepausicion egalitària e que se pòt verificar aisidament. Ai tanben una idèa pel nom de l'Assemblèa de femnas, Olimpa de Goja (una occitana en memòria dels seus escrits e proclams republcians), e pels òmes, Napoleone Buonaparte (en memòria còrsa de la republica de Paoli que ne faguèt jamai referéncia).

Me sembla tanben que tot aquò es plan rasonable, sense cap dobte un estauvi per un enebir lo reviscòl d'afar Beaupin pel XXIen sègle.

Mercés a la santa republica laïca francesa pensada en Occitània, podrèm mandar representants en tota securitat democratica. Es lo socialista Manolito Valse que ne deuriá èstre content.