L'Estat francés se trufa de quí ?

A la question en títol, vos pòdi dire que l'Estat se trufa dels ciutadans d'Aquitània e Miègdia-Pirinèus e dons dels representants elegits, que per assegurar l'argument, son de la mesma color politica que las ministras en plaça.

Mas ara, vòli mandar un messatge politic seriós e imminent (car serà legit sul pic) al president de ma region administrativa francesa, lo gente Martin Malvy (e donc tanben al gente Alain Rousset) : de qué imminent vòl dire.

Dins un comunicat del diluns passat Martin Malvy, ancian jornalista e que sap causir los mots, installa dins lo seu comuncicat lo mot IMMINENT. Èrem diluns 1er de junh 2015, 2015!, diluns passat a 18h00.

Lo lendoman, dins l'actualitat, lo jornal L'Orient Le Jour, emplega tanben aquel mot dins un article per determinar una invasion d'una ciutat de Síria pels jihadistas. Èrem dimarç a las 19h00.

 

Per una astrada qu'espèri IMMINENTA, pensi que las liberacions al Liban serà mai imminenta que la politica lingüistica seriosa per l'occitan.

Donc soi estat cercar la definicion dins un diccionari francés tradusit en occitan per saber çò qu'imminent vòl dire :

Es un emprunt del latin, lenga que vòlon destrusir dins l'ensenhament al collègi, en companhiá de l'occitan (manifestacion imminenta tanben per l'occitan al collègi dissabte 6 de junh 2015 a Peirigüers), imminent p.prés.adj. De immunere «èstre suspendut al-dessús», «amenaçar», [….]

1. Que se produsirà lèu dins un avenidor aprosmat, dins pauc de temps (en parlar de çò qu'amenaça) → pròxim. Dangièr, perilh imminent , → amenaçant, Sens dangièr, imminent, → sul pic, Rompadura, arrestacion imminenta.
2. (1821, sense idèa d'amenaça) L'instant imminent de son arribada, «Marius aviá pro pauc viscut encara per saber que ren es pus imminent que l'impossible, e que çò que cal sempre preveire, es l'imprevist» [Hugo, Les Misérables, traduccion pel bilhet]

Contrari : Elonhat, lontanh

«Res es pus imminent que l'impossible» es aiçò que lo jacobinisme explica a Occitània cada jorn ; es pietadós de veire qu'i a elegits (e qu'an votat a l'inanimitat en ...junh 2014!) qu'an la plega-esquina pel jacobinisme aisida, mèstre l'avètz magnifica e imminenta, talament que sabèm pas coma nos fa... diplomaticament, car la color politica es la mesma a París e en regions occitanas ; e se podrà pas dire que la diferéncia de colors politicas frena ! Avèm una pichona memòria istorica.

Se volèm plan indicar que lo sens que se comprendrà dins los neurònas dels elegits en carga de la delegacion de poder del sistèma decentralizat, podèm confirmar que los jihadistas los faràn mai imminent que lo jacobinisme, qu'es puslèu elonhat de la rapiditat que cal per una bona gestion del sistèma centralista francés.

E badini pas, quand legissi aquel comunicat conjunt, editat a Tolosa a 21h00 aquela nuèit del 3 de junh de 2015 (imminent per atudar lo fuòc de l'enràbia occitana), 1 / sabi ara çò qu'imminent vòl dire pels jacobins, 4 a 5 meses adaptats pels Occitans (solament pels Occitans), e donc 2 / soi plan enrabiat per un sistèma que sembla a esperar un an perqué doás ministras legisquèssen lo projecte votat a l'inanimitat pels elegits dels Conselhs Regionals d'Aquitània e Miègdia-Pirinèus, e que lo signèsse, sense quitament donar d'argent pel projecte (es de dire !).

Se volèm una pròva de l'inutilitat del centralisme francés, l'avèm ENCARA de faiçon subtana, aquí. E avèm res demandat !

E per nos fa passar la pillula, al potinga jacobina (cal pas èstre enrabiat, díson mantunes sapients de l'occitanisme plega-esquina, e animators de ràdio que parla bigordan), nos explícan que lo projecte serà mai grand qu'a la debuta, coma se los Conselhs Regionals vesins occitans èran pas pro madurs per o saber solets ! Plan plan... de façon imminenta, modèl Martin Malvy, lo regionalista de l'etapa !

E se en decembre 2015, de façon imminenta, valor jacobinisme francés per l'occitan, votaviàn de manièra imminenta per els ? Que ne pensatz ?

Donc, aprèp aver esperat un an, ambe d'elegits regionals que semblan s'en trufar grandament, cal esperar 4 meses de mai, e aiçò es «imminent» segon Martin Malvy e Alain Rousset.

Lo jacobinisme e los aligats de la delegacion de poder, me fan pietat.