es un pauc en memòria de la decision del Tribunal administratif de Montpelhièr, e de la condamnacion de la vila de Vilanòva de Magalona, ai escrich aqueste bilhet.
Car dins aqueste afar, es ben un ensemble de causas que fan mai claras la volontat administrativa del sistèma francés en Occitània… Los que nos vòlon far Franceses en Occitània (Universitats en general, coorporatisme professoral, sistèma partidocrata, etc.) , son los que son del costat de l’administracion e de son tribunal, per destrusir la visibilitat de l’occitan. Hadjadj nos aurà bravament ajudat per esclarir l’afar, es segurament involontari, mas es aital ; avèm agut una bona astrada per Occitània en 2010, annada que los pontif de l’occitanisme avián pas previst una manifestacion, e l’avèm agut gràcia a Hadjadj. O tòrni dire, lo Hadjadj de Vilanòva de Magalona deuriá aver una medalha donada per l’occitanisme politic, per aver agir clarament contra l’occitan e condamnat l’administracion a una senténcia sense cap ni cuò, mas clarament contra la lenga que fabrica lo país nòstre dempuèi mai de 1000 annadas. Avèm aital determinat l’enemic de l’occitan, es lo sistèma administratiu francés. Tot sistèma politic qu’ajudarà aqueste sistèma, serà un crimi contra l’occitan. S’espèra una lei, mas quora Occitània se prendrà en man ? Aital la lectura dels tèxtes de Cornelius castoriadis sobre l’autonomia dels individús e dels collectius es de mai en mai important per totes los militants de l’occitanisme, e per totas las militantas totparier (totparier pas pron nombrosas).
Puèi acabi de legir aqueste article de presentacion d’un libre sortit en Angletèrra, l’article se titola Great Writs, lo libre es estat escrich per Paul D.Haliday. La primièra colomna de l’article me sembla pron utile per una pensada dels pòbles, e m’a donat l’escasença d’anar veire las definicions en francés e anglés, mai tanben en catalan, vist que per l’occitan i a pas de diccionari digne d’aqueste nom per poder gaitar.
Habeas Corpus es una causa estrangièra a l’Estat francés, l’Estat pòst revolucionari, pòst 1791, perqué l’Estat francés es establit sobre donadas juridicas totalitàrias. Es aital que demandar un Habeas Corpus pels ciutadans e per las ciutadanas es una revolucion en França… Alara zo demandar pels pòbles sotmetuts, imaginatz !
La Carta Europèa de la lenga minoritària serà jamai signada per França, jamai, e Turquia serà dintrada dins l’Union Europèa, bravament abans una eventuala pensada positiva sul tèma.
E çaquelà una lei per las lengas de França es jà un camin cap a-n aqueste Habeas Corpus pels individús, per reparacion istorica de tantas annadas d’extremismes franceses, reial o republican.
Nos apercebèm aviat que d’un sistèma politic cap a un autre, l’Habeas Corpus es practicat de faiçon diferenta.
Es que podrèm aver un Habeas Corpus occitan ? Lo dreit catalan existís, lo dreit occitan es refuzat pels meteisses Occitans dempuèi sègles, en participar a la basteson e la manipulacion francesa d’aqueste dreit uman, çaquelà essencial.
Comprendrèm aviat que l’Habeas Corpus occitan es jà la liberacion nacionala… quitament s’es pas aplicat mas simplament estudiat, escrivut, publicat. comprendrètz alara perqué i a un guèrra politica en Espanha, Catalonha e Aran per aver la justícia dins la sola lenga del país, espanhòl, catalan o occitan segon los endreits, e la lenga raiça, istorica e politica. car lo problèma de l’occitan es primioèr politic, abans d’èstre lingüistic, o d’abséncia de locutor o de transmission dels sabers lingüistics.
Justícia francesa pertot
(Tribunal Administratif a Montpelhièr per ex.),
Occitània a cap endreit.
E lo Tribunal Administratif es la justícia pel pòble occitan ?
Atencion una justícia occitana, vòl pas dire de personal occitan a las manetas de la justícia francesa en Occitània ; la collaboracion ambe lo sistèma es pas viure al país ambe la moneda del poder qu’escana lo país.
Lo grand problèma de l’occitanisme es qu’a limitat lo projecte politic a la frasa “Volèm viure al país”, uèi nos avizèm que volèm saber las condicions de vida occitana al nòstre pròpri país, e n’avèm pas cap aisina normala per una nacion adulta, coma per exemple Catalonha. Lo sistèma francés de gestion del país occitan es pas sufisent, es puslèu lo contrari d’Occitània ; en Catalonha, se ne son avizats, e uèi son independentistas. Mas èstre independentistas (Libertat, PNO, etc.), abans d’aver la aisinas de la liberacion, es pas lo bon camin per Occitània. Es un camin politic que farà páur, e qu’ajuda França d’espotir Occitània.
Avèm Habeas Corpus per Occitània ? NON, alara ? Que fasèm ?
Cap comentari:
Publica un comentari a l'entrada