L’informacion la dona Som Ràdio de Barcelona. L’ai pas legida nimai vista o escotada sobre cap cadena de television o ràdio en Occitània, cap premsa escricha entre Bordèu e Niça, nimai entre Lemòtges e Salses, o Baiona e Valença.
E al meteis moment, lo debat sobre l’immersion lingüistica introdusit pel dich Tribunal Constitucional espanhòl dintrava dins las carrièras de la ciutat de Barcelona.
Se tracha d’un imposicion lingüistica, dempuèi Madrid, aquesta de l’imposicion d’un modèl francés per l’educacion ; lo modèl francés es lo fracàs lingüistic clar, o podèm constatar cada jorn, quora diplòma i a per una lenga o una autra, las competéncias dels estudiants franceses son de mai en mans redusidas per la practica lingüistica.
Lo modèl d’immersion lingüistica catalana es estat valorizat favorablament per las institucions europèas coma un vertadièr modèl d’aplicar a tota Euròpa ; Espanha ne vòl pas, nimai los coorporatismes lingüistics franceses (angleses, espanhòls, franceses).
Lo Tribunal Constitucional madrilenc, coma lo Tribunal Administratif (administratiu en occitan) de Montpelhièr, pòrtan una vision estrecha de l’umanitat lingüistica d’aquesta planèta, pòrtan un messatge nacional-expansionista, la conquèsta lingüistic se deu perségre…. Es un messatge que l’occitanisme a sempre combatut perqué favoriza un messatge nacional-expansionista de la politica dins l’Estat francés e espanhòl ; lo modèl francés es de desfugir per Occitània ; lo modèl catalan es d’interessar mai que los elegits e las elegidas d’Occitània, tanben lo monde de l’entrepresa, sobretot lo que trapa dins l’anglés la salvagarda universala per aver recebut dos doctorants d’Havard a Tolosa per l’universitat de sciéncias economicas….
Uèi es de se questionar de qué servís l’universitat, aquí en Occitània ? A valorizar un mercat mondializat o a favorizar l’economia d’un territòri ? En Catalonha an causit l’immersion lingüistica per desvolopar un territòri tot en daissar la plaça al mercat mondial. França preferís sonque lo mercat mondial, per aver unas eventualas publicacions de recèrca dins revistas mondializadas... e de la finança bolegadissa.
Que podèm esperar de l’universitat modèl francés en Occitània ? RES.
-°-
L’esperantisme que defend oficialament lo plurilingüisme dins los Estats centralistas, es un esperantisme que m’agrada perqué pensa pas l’unilingüisme coma la solucion extrema per la compreneson.
L’esperantisme que se pensa coma una potinga lingüistica per sortir los monolingües de la malautiá que son, lo monoteïsme lingüistic, es un esperantisme fòra del modèl francés ; m’agrada. Es exactament lo contrari del messatge que los esperantistas franceses an donat recentament ambe una dobla pagina de publicitat dins Le Monde.
Podèm dire clarament qu’i a dos esperantismes, lo francés o al modèl francés, e los autres esperantismes (l’excepcion francesa s’exprimís tanben dins l’esperantisme). Ai jamai vist un comunicat en esperanto per sosténer una politica lingüistica per l’occitan dins l’Estat francés, un comunicat vengut dels esperantistas franceses.
Cap comentari:
Publica un comentari a l'entrada