Quinas son las diferéncias que fan que la situacion es diferenta, e aquí vòli pas escriure en nom del PP o conservator-liberal-ultra-catolic Mariano Rajoy que sempre vòl parlar d'aiçò (sense listar çaquelà), mas punt a punt trapar diferéncias que faràn responsas e que las responsas faràn que las diplomacias mondialas seràn rasseguradas.
Cada còp qu'un element de l'argument imperialista es donat, jamai es estat mai aisit per far pujar l'independentisme.
Aital Sí-i-Sí en Catalonha, o Yes-Aye en Escòcia es pas la meteissa causa que OUI a Disneyland Paris. Es una question de separacion d'una politica liberala de London o Madrid contra los pòbles catalans e gaelics d'Escòcia. Es non pas una question sentimentala, compassionala, mas una acarament d'arguments poltiics, socials, istorics e economics, tot aquò suportats pels pòbles dels impèris anglés e espanhòls.
Aital quora los Orangistas, extremistas d'Irlanda (al nòrd, e sonat Ulster per error), van manifestar a Glasgow per l'unitat del United Queendom, son los vòts independentistas escoceses que pújan.
Aital quora un nenet es anonciat per la familha reiala, se pensa que farà plaser a l'unionisme d'Escòcia... e lo fenomèn sembla èstre similar quora un membre de la familha santa de Castilha visita Girona, per èstre «Princep de Girona» ; aquel devendrà rei per estauviar sabi pas qué al darrièr Borbon en plaça a Madrid e en Euròpa. Soi aital en contradiccion ambe la premsa tipe Ici-Paris sul tèma de las familhas reialas.
Aital quora un PSOE, supausat èstre del costat del pòble d'obrièrs, se passeja en Catalonha es per acreditar la politica liberala de Madrid ; es lo meteis fenomèn en Escòcia quora un laborista demanda l'unionisme en Escòcia, es de dire la politica del govèrn conservador e liberal anglés per totes dins l'Estat del United Queendom.
Podèm listar fòrça similutuds, la lista es longassa.
Donc son las diferéncias que son utilas.
1 / Madrid refusa una consulta, perqué pensa que los sondatges son bons, dins un Estat que son grandament de mendra qualitat ; estonent non ? Westminster accepta lo referèndum car los sondatges fan saber que, al moment de l'acceptacion, son favorables ; an en memòria lo referèndum de Quebèc, ganhar per la Federacion canadenca.
2 / segon los Franchimands, Escòcia es una nacion, pas brica Catalonha ; çò qu'es una pròba d'ignorança de las grandas, sobre Catalonha ; es pas la primièra ignorança francesa ; per Escòcia lor auràn calgut mai de 50 ans per comprendre qu'Escòcia es una nacion (Al rugbí, sempre èra objecte de rires televisuals dinca las annadas 1995) ; donc cal eliminar aquesta diferéncia, i a doás nacions concernidas Escòcia e Catalonha.
3 / Escòcia e Catalonha aurián pas sistèma economic similar, son similars dins l'emplec de la moneda faita en Escòcia e emplegada a Westminster per l'Estat del Estat United Queendom ; per Catalonha son pas las resorgas de la tèrra que fan la riquèssa panada per Madrid, es lo trabalh d'un fialat d'entrepresas prichonas e mejanas, contra una Castilha qu'es una economia de renda anciana, o de l'Estat de Castilha ambe totes los avantatges del mercat-Estat-nacion. Avèm aquí dos sistèmas economics qu'an de suportar doás espoliacions similaras, es un sistèma imperialista que fonciona de manièra similara e que dins cap cas fabrica una solidaritat, per las regions pauras, ambe aquel argent ; al contrari es desgalhada per un sistèma financièr anglés que pausa problèma a la planèta sancièra, o desgalhada per favorizar la renda castilhana a Madrid.
4 / I a pas d'umiliacion anglesa en Escòcia … en Espanha, sí. I a jamai agut un sol assag seriós d'Espanha per parlar de revision de l'acarament entre aquelas doás nacions, al contrari lo sistèma dit constitucional a fabricat los problèmas, o per cambiar la constitucion pendent 30 ans res de novèl, sonque una tresena via en fòrma d'endrona, la solucion socialista. Es lo PP al poder a Madrid. Sus aquel terrenh, lo NO de Madrid per parlar sembla al NO dels Angleses pel referèndum, mas per cambiar las institucions los Angleses semblavan mai aluzerpits ; mas aquò farà pus illusion aprèp lo referèndum d'Escòcia.
5 / Escòcia es vesin d'anti-europèus grèus, UKIP per exemple. Espanha a mestièr de pauretat per trapar l'U.E. Coma ajuda per èstre dedins l'U.E. - cal plan notar que lo sistèma politic anglés es puslèu una gròssa plutocracia agenolhada a un sistèma vièlh d'una monarquia encara mai vièlha ; es tot levat una modernitat ; Escòcia independenta es un sistèma scandinau que son en dreit d'aver, lo modèl es de Norvèja, en fàcia las còstas Èst del futur Estat gaelic.
6 / I a una coneissença del monde anglofòne sus Escòcia, al pus naut nivèl dels poders mondials. Es clar que per far conéisser Catalonha, quitament del temps de l'autonomia, aurà calgut mantunas campanhas de comunicacion ; Madrid monopolizava tot e oblidava los Catalans ; es clar qu'a Madrid per èstre naut-foncionari d'Estat, val melhor pas èstre catalans. Donc se retròban dins als institucions del monde sancièr ; los Escocesses, els, son estats als govèrns de Westminster, mantunas vagadas dempuèi 40 ans.
7 / Escòcia es pas vesina de França … Catalonha sí ; Donc, aflaquir Angletèrra pòt ajudar França o pas. Es qu'Angletèrra sense Escòcia es tanben Catalonha sense Espanha ? Los poder en plaça dins los Estats vesins, en reconéisser Escòcia aurà gaire de problèma ambe Angletèrra, mas ambe Espanha, serà puslèu violent ; alara pel moment tot es calme, es de dire, val melhor res dire.
8 / I a l'armada nucleara en Escòcia … e l'armada espanhòla es pietadosa donc pas grandament utila per l'OTAN. En l'abséncia de politica militara per l'Union Europèa, causa que refusa los Angleses, e los Franceses, l'OTAN es una peça majora de la realitat politica europèa ; o vesèm ambe los novèls Estat independents de l'Euròpa de l'Èst ; alara, perqué l'OTAN seriá pas tanben una peça importanta per la securitat de l'Euròpa occidentala, Escòcia e Catalonha ? Per astre, dins l'OTAN França pòrta gaire que la man-d'òbre e la dissuassion nucleara, gaire emplegabla en Catalonha e Escòcia. E vesi mal una armada de l'OTAN arribar «per pacificar» la democracia en Catalonha o Escòcia... La manipulacion espanhòla a limits !
N'ai oblidat benlèu mantunas causas, mas me sembla que son causas bèlas que fan diferéncias entre los procèssus catalan e escocés.
-°-
Cap comentari:
Publica un comentari a l'entrada