Ai parlat recentament del biais de determinar l’identitat per Brageirac dins la seuna comunautat de comunas. Aquò dona mai o mens l’impression que las comunautats de comunas devon èstre d’instruments per e de l‘administracion e lo mens possible èstre tocant a la populacion, donc d’identitat mai o mens administrativa, res de veire ambe l’identitat que las populacions pensan aver. Sèm en plena tecnocracia, çò qu’aima plan la futura reforma de la decentralizacion, desumanizar los contactes entre lo politic e la populacion, ambe l’ajuda de l’administracion, sempre volontari. Sense comptar que l’ipocrisia del politic que lor agrada pas d’aver a discutar dels projectes ambe la populacion, els qu’an sempre rasons tecnicament e politicament, e sembla que per los arrestar, i a pas que l’endeutament collectiu (alprèp de Dexia!).
Un autre exemple, se me podètz dire quin vilatge es concernit, campion !
Lo tèxte sobre l’identitat explica : « Coma la comuna servarà la seuna identitat pròpria ? » La question es pausada, la responsa corta e tecnocratica.
«Sèm fièrs d’aparténer a una granda comunautat de comunas que baila una egalitat de servicis a totes los ciutadans. Mas aquò negarà de cap manièra cada comuna de gardar las euna identitat. Aquela de …… (devinhatz aquí) damora, cresi (lo tèxte es pas signat mas es del cònsol màger), dins lo seu espaci de vida que i sentissèm plan a viure, e que las relacions umanas i son importantas» Avètz aquí lo tèxte qu’assegura cap indici per trapar la comuna.
Es aquò lo ròtle del cònsol màger negar tot problèma de comunicacion, donc i a res de tirar del tèxte.
Sèm rensenhat mai luènh sobre la «hèra de Sent-Luc», donc sèm en Gasconha, mas aurián poscut èstre en Gavotina, o Dalfinat, Auvernhe, o Lemosin, veire en Lengadòc o Peirigòrd (Brageirac).
Dedins lo document vesèm que lo redactor en cap, lo cònsol màger, es content de promòure l’escòla d’Estat (servici public que dís – donc dèu èstre de l’esquèrra), mas avèm tanben una publicitat per las formacions privadas ditas catolicas (servici privat – donc dèu èstre de la dreita) … Aquí vau donar un indici, dins aquesta comuna i a una Calandreta ; lo Cònsol màger que redigís lo document ne parla pas brica : ne podèm far la conclusion següenta, es nacionalista francés e bonapartista per emplegar lo verbiatge de l’administracion.
Vos pòdi donar un autre indici, malgrat la demanda politica e publica, suls panèus comunals nòus, i a pas de bilingüisme francés occitan :
Ni dins las escòlas d’Estat ditas publicas (pron valorizadas aquí e dins la boca del cònsol màger), ni dans las escòlas privadas e revendicadas coma catolicas (que la promocion s’illustra dins la revista del Cònsol màger), escòla catolica que l’occitan es ensenhat a docina, veire RES, coma dins l’Éducation Nationale :
Aquela comuna es donc una comuna industriala, mas de quina color politica es lo cònsol ?
Lo mai pietadós es que la reforma dels PSf-PRG-UMP-UDI vòlon prendre en compte aqueles biaises desumanistas de crear un sistèma politic elonhat de las populacions, «communauté de communes», car las populacions fan problèmas, e «jà n’i a pron !». Es que caldrà tornar las guilhotinas per assegurar una bona representacion de las populacions, e gerar realament las administracions ?
Un autre indici, sèm pas a 1500 m d’altitud.
E çaquelà la lenga de fusta, un autre indici (de husta), es grandament practicada, pas brica valorizada çaquelà.
La responsa es donc : Artics !
Cap comentari:
Publica un comentari a l'entrada