arcuèlh

divendres, de març 13, 2015

Collòqui del 4 d’abrial a Tolosa

Aprèp Narbona, una organizacion País Nòstre, sul tèma simplàs del nom que cal donar a la novèla region administrativa francesa, Convergéncia Occitana se prepausèt d’organizar a Tolosa, un collòqui per agrandir lo subjecte, un gròs subjecte e que tòca a la novèla ciutadanetat francesa dins aquela novèla region sense nom : aital al debat seràn lo nom, la capitala, lo contengut de la novèla region e dels poders dits regionals.

De cap manièra, ni a Narbona, ni a Tolosa, se tracta de «reunificacion del Lengadòc» ; la persona qu’escriu aquò sap pas que las regions administrativas reialas èran simplament zònas fiscalas e que lo «Lengadòc» èra pas mai qu’una zòna fiscala qu’emplenava qu’una pichona partida de la region administrativa francesa novèla.

La primièra partida de la jornada justament assajarà d’esclarir aiçò de las sapienças sul tèma. E aital lo debat podrà sanitosament debutar.

trac del collòqui de Convergéncia Occitana

Puèi se tracta pas de fabricar una novèla region ambe los noms de l’ancian regime ; me sembla que mantunes sovenirs son encara al cap. Roergue, Carcin, Armanhac, Bigòrra e Comtat de Fois, amai Catalonha sanccionada pel tractat dels Pirinèus ne faguèron jamai partit, lor a costat caríssim!

Puèi se tracta pas de fabricar una region dialectalament etnica ! Senon 15 km abans Nimes cal sortir la zòna provençala e es pas tot lo departament de Gard ! Senon l’Agenés al nòrd de Garona demandariá lo restacament !!

Non, cal èstre seriós, al delai del romantisme politic o poetic, sèm pas a bastir una farlabica tal que França nos voldriá installar. Sèm plan a donar de contengut a una novèla region tal que París, lo legislatiu parisenc e los «representants» creators de la lei parisenca, nos l’an imposat. Es lor dreit constitucional, o cal pas negar. E coma sèm ciutadans legals, ne volèm parlar, perqué tocarà lèu l’economia e lo social regional.

Cal donc trobar un nom a una region de l’Estat francés que reberta plan l’identitat economica e politica de la novèla region administrativa francesa.

Lo debat es dubèrt a totes e totas, de Perpinyà a 15 km aprèp Nimes, de Solhac a las pòrtas d’Andòrra, del lindal bearnés en Bigòrra dinca Seta, de Condom dinca Font Romeu, etc. E se trapa que Tolosa vòl pagar una organizacion ciutadana per aquel debat ; sembla que serà enregistrat en vídeo. Es pas un debat OFICIAL de las institucions de la decentralizacion, es un debat que serà ciutadan, segon çò qu’ai puscut entendre dels organizators tolzans.

Ieu i serai e vos encontrarai benlèu.