Question editoriala tanben a la DDM

Entre Corrída e Ors !

La portada e la dobla pagina per la DDM per la corrída espanhòla es pas estonanta pel jornal qu’es pastat de nacional jacobinisme republican francés. Mas çò d’estonant es la quantitat de paginas ambe de contenguts que son ligats a la politica de lisa-sabata correnta dins la redaccion de la DDM, mai tanben de l’estrecha ligason entre lo comèrç de bièra nordenca en país occitan, comèrç que paga regularament suplements a la maison DDM, e al grope de premsa. A Fenolhet l’organizacion de corrída èra possibla gràcia als vendeires de bièra d’importacion nordenca, e als prètz importants de las plaças de corrída, plaças per una casta d’elita tolzana, qu’a la costuma de nos explicar un fum de causas per la morala dins las loras escòlas republicanas.

Se podrà notar dins las doás paginas prepausadas per la DDM, una mapa de las localozacions de las arènas de corrída espanhòla, mas pas brica una informacion sobre la meteissa zòna per las corsas landesa o camarguesa, corsas pacificas, e pas ges ajudadas per la multinacionala de la Bièra, nimai gaire pels politics que vesèm sosténer la matança oficializada de l’ors.

I aurà pas cap comunicat de sosten als anticorrída, levat los que son ligats al FN, Brigitte Bardot. Lor cal dire qu’an plan agut rason vist lo retard que lo Partit Occitan li aurà calgut per non ne far un … alara que per l’ors lo Partit Occitan es present, e ges publicat çaquelà ! Aurèm pas tanpauc un comunicat del Partit Occitan sobre l’arribada del l’Institut Bearnés e Gascon dins los agrements subvencionadors del Conselh General socialista recentament elegit a Pau.

Comunicat del Partit Occitan de Bearn, e mandat pel secretariat centralizat a Tolosa, sobre lo tèma de l’ors :

Pau, lo 03 de junh 2011

Comunicat de premsa

Electoralisme e desresponsabilizacion

La decision de subersedir a la reintroduccion d'ua orsa en Vath d'Apsa qu'ei ua decision electoralista. Un còp de mei que pròban que non i a pas nada coëréncia en aqueth dorsièr. Qu'ac hèn tot au còp per còp e que navigan a vista. Non i aurà pas arrés qui seràn acontentats per aquesta decision e lo dossièr que demorarà tau com ei dab las pelejas qui coneishem. L'Estat que contunha de s'encuentar d'aqueth ahar shens nat seriós.

La question que's poderà reglar sonque se i a dialògue e en har çò qui cau entà que la question sia presa en compte per las collectivitats territoriaus (regions e departaments pertocats). Dialogar que vòu díser que tot lo monde que's deven trobar a l'entorn de la taula e que non cau pas mei esperar que l'Estat e prenga un dia ua decision favorabla tà l'un e un aute dia ua decision qui agrade a l'aute.

Qu'ei dens la descentralizacion deu debat que trobaram la solucion . Los elegits deus territòris que deven estar responsabilizats e, com aquò se hasó dens d'autas regions d'Euròpa, que deven assumir ua decision shens descargar-se a contunhar sus l'Estat, en esperar atau que poderàn díser que n'ei pas de la lor fauta mes que tot lo mau e vien de l'Euròpa o de París.

Qu'avem l'immensa responsabilitat e la grana escadença de poder mantiéner la preséncia d'aqueth animau dens los Pirenèus. Non la cau pas mancar. Los nostes mainatges non ns'ac perdonarén pas. Mes aquò ne's harà pas shens assumir las decisions e las consequéncias d'ua tau accion. Au dia de uei tot lo monde que que son desresponsabilizats e la politica de l'ors qui s'ensegueish qu'ei sonque la deus grops de pression. Un dia qu'ei òc e un dia qu'ei non. Lo resultat qu'ei quasi segur la disparicion de l'ors e los qui viven en montanha, non vederàn pas pr'amor d'aquò, arribar la solucion a las lors dificultats.

L'ors n'ei pas per arren dens las dificultats de l'economia montanhòu e de l'agricultura prumèr.

David GROSCLAUDE, Conselhèr Regional, Partit Occitan

+

Avèm alara un títol que parla e bufa pel sotlajament politic redaccional, qu’explica fòrt tanben la linha editoriala de la DDM ; «il n’y aura pas de nouveau lâcher», ouph… :

La redaccion de la DDM sembla pas aver lo punt de vista de l’Europe Écologie, nimai del Partit Occitan. Lo telefòne dèu pas èstre dins los agèndas… de la Pradeta.

O cal tornar dire la corrída es un afar espanhòl per matar la tradicion occitana que son las corsas landesas o comarguesas. E aiçò de la corrída es del meteis nivèl que l’installacion d’Andaloses a Barcelona per Franco per destrusir lo catalan. La corrída ajuda a imposar un biais de far la fèsta, har la hèsta, coma se las corsas èran pas en capacitats tanben de portar aiçò.

Un jorn aurèm un mèdia en Occitània que podrà donar lo punt de vista de totes e totas…. cal aver d’espèrs dins la vida, non ?

-°-

Se debanava uèi en Aquitània, Sud Gironda, debat a Barsac, en companhiá de  Philippe Meymard, MoDem-Force Aquitaine, Conselhièr regional d’Aquitània, David Grosclaude, EELV-Partit Occitan, Conselhièr regional d’Aquitània.