Jean-Michel Baylet, cap-d’entrepresa de La Dépêche du Midi, serà pus president del Conselh General de Tarn-e-Garona. La dreita del departament aurà tot assajat per l’en sortir (quitament crear un jornal concurrent e a còps que paga mal los emplegats), quitament li botar una femna dins las cambas a Montalban, una femna que brilha pas per sa democratica tenguda, segur, ni aquí a Montalban la protestanta, ni a Tolosa la legitimista.
Mas en Jean-Michel Baylet serà pus president, es encara un brilhent elegit de Valença d’Agen, la centrala EDF ajuda bravament a donar de l’interès politic a Jean-Michel Baylet, sus aquel terrenh, la linha es segura dempuèi mai de quaranta annadas. la sola causa de verda dins lo departament es lo país toristic (bravament polidet Carcin de Montalban e meravilhosa Lomanha), e lo site Internet del departament a la sortida de las darrièras eleccions.
Jean-Michel Baylet es encara çaquelà president del PRG, li damora d’infuéncias politicas. Mas del PRG podèm aver dobte sus la linha clara al nivèl politic, qu’agrada o pas al seu president. veire l’entrevista de France 3 que dona un comentari d’el sul tèma de la perta de la presidéncia de Montalban.
Donc es normal de recebre los condòls electorals d’un vièlh amic de campanha, en Martin Malvy.
Lo mai estonent es la candidatura que ganha la plaça, lo paisan elegit Christian Astruc –astruc vertat (!)-, lo cònsol de Dunas, es plan conegut per ajudar, coma republican clar, lo devolopament de la pedagogia politica al torn de l’occitan ; çò qu’o cal dire, es jamai estat lo cas de Jean-Michel Baylet, malgrat sa preséncia a Pau per Hestiv’Òc, vaquí tres annadas ; tres annadas aprèp e malgrat las promessas de campanha dedins lo PSf per la candidatura a la presidenciala del partit amic, lo Conselh General de Tarn-e-Garona a res vist venir per l’occitan, pas d’aument de budgecte e pas de visibilitat per l’occitan … E dins las comunas que lo PRG es al poder, l’occitan s’i vei pas grand causa desvolopar.
Donc l’amic del nuclear* «tarn-et-garonnais» (* de las seunas finanças amigas, vos podrai contar de quina manièra lo nuclear ajuda a votar plan coma cal), serà pus president del Conselh General, e la majoritat UMP a causit un candidat que se presentava coma «divers gauche» (classificacion prefectorala, que me sembla aver un grèu problèma dobla, ne parlarèm un autre còp). Aquò me recòrda un fum de causas, per exemple, lo cònsol de Vilareal (departament vesin e productor de prunas confidas tanben), elegit grand (per la talha e factur de profession) qu’es estat un «grand amic» d’en François Mitterrand dinca aver un secretariat d’Estat, puèi qu’es passat a CPNT, puèi a l’UMP. Aquel se donava mens cotria ambe la promocion de la lenga occitana.
Çò que rassegura – ara- es que La Dépêche du Midi aurà recuperat al plen temps son pdg.
-°-
Cap comentari:
Publica un comentari a l'entrada