arcuèlh

dijous, de juny 04, 2015

Felicitacions a David Grosclaude per las bonas novèlas

Dins la vrespada de ièr, recebiái una imatge de Jean-François Laffont qu'èra plan simbolic del sistèma francés, es jacobin e una androna. Mas o dirai a Joan-Francés Laffont cal pas abandonar l'encontre prefectoral tolzan, cal sortir de l'androna (veire la fòto), vist qu'ara la capitada sembla sancièra, se tot s'enfiala plan coma indicat per mantunes/as dins los moments cauts de la nuèit.


Cal pas abandonar de donar d'explicacions als agents de l'Estat, agent de la gestion jacobina d'Occitània, els, coma jòc de carta, serián autanplan capables de copar lo cap a Montmorency que de desvolopar una politica per la lenga occitana.
 
Mas anuèch es temps de fèsta al Conselh Regional de Bordèu, e sobretot de felicitacions a David Grosclaude.
 
Un aplec de fèsta es previst al Conselh Regional d'Aquitània, a las 16h00 al vrespe. Pensi qu'i serà nombroses los militants de l'occitan e de sa dignitat.

Cal felicitar tanben los autres militants (que vegèri en realitat o en fòto sul net), militants del Partit Occitan d'aver acompanhat David Grosclaude dins aquela batalha.

Una cauma de hami es pas aisida per totes, o totas. Es evident que la responsa a un Estat avuglat pel jacobinisme non podiá èstre qu'aquela, dins la situacion critica que sèm, lo comunicat de Convergéncia Occitana es pro clar sul tèma, e amai es jà un pauc optimista, alara ! Mas avèm la simpatia de la populacion e aiçò val un decret, enfin çaquelà es pas pro.




Vos conselhi ara de legir sancièr lo comunicat del David Grosclaude, en lenga occitana plan segur.
Se podrà pas dire, escriure e contar que l'occitanisme sap pas emplegar los mejans modèrnes de comunicacion e se podrà pas dire que podèm pas far sense los mèdias parisencs de comunicacion, vist que lo boicòt, en una setmana, es estat una realitat de cada jorn, i a sens qu'una redaccion parisenca qu'a gausat (cal emplegat aquel mot encara) escriure, enregistrar o filmar l'eveniment per la lenga occitana, una primièra cauma de la fam en fRança per una lenga, l'occitana.

Ièr jà a 23h, lo «blòg occitan» signalava la fin de la cauma, e lo vírus numeric s'es passejat coma un fuòc en Provença, o coma l'anoncia del 27 de mai darrièr. E sembla que las novèlas occitanas d'anuèit, son sempre bonas e acompanhadas. 

Mas atencion l'Estat francés, fabricat per una administracion centrala e decentralizada, sas universitats, sas escòlas, sos mèdias publics o privats (sempre de propagandas), son sistèma partidocrata, sap organizar l'engana tanben, o cal pas oblidar, es per aiçò que totas las protestacions devon èstre acompanhadas e multiplicadas, a cada moment que la lenga occitana amerita una protestacion comuna, fàcia a un Estat jacobin qu'amerita sempre lo castig perpetual.

E cal felicitar totes los actors politics del sistèma partidocrata que fan lo bon camin cap a la dignitat de l'occitan, enfin !