arcuèlh

dilluns, de juny 08, 2015

La Razón : lo franquisme viu encara

Segon la dreita espanhòla, pòst franquista, Chávez es un extremista perqué es d'esquèrra, o fabrica una politica etiquetada a esquèrra.
Bon, perqué pas cadun sas incompeténcias dins l'etiquetatge politic ; es una etiqueta donada per un jornal d'opinion dit La Razón, que de rason n'a gaire.
La pròva ?
La seguida, La Razón excriu "Hasta en las cartas de los restaurantes", dinca escriure las cartas de menús en valencian, lo valencian, o catalan de totes a Valéncia, Elx, Alacant !
Soi segur que fau lo torn de la còsta que los restaurants devon aver escrit en anglés, alemand, francés o espanhòl, las cartas dels menús, dins lengas dels toristas del País Valencian, normal non ?
Donc, escriure un menú dins la lenga d'un país de lenga pròpria e mesprezada, segon La Razón, es un «acte d'extremisme», un acte de terrorisme que se gausèm nos diràn que val los atemptats d'ETA !


Ieu, questioni : quí es terrorista ? Los restaurants que fan los menús en lenga locala, e dins totas las lengas qu'an mestièr, o La Razón que val per sos escrits un extremista d'esquèrra.... modèl Chávez !

Es aquel extremisme que fabrica Espanhòls que refúsan de veire las bandièras independentistas e que s'en van dels òtels quora la veson a Andòrra.

Quina idèa estranha ! Se fabricar menú en occitan, valencian (lo catalan de totes a Valéncia), basco, galician, sard, còrse, breton, alsacian, arpitan, flamand en Flandras, creòl dins las Isclas d'Oltra-Mar de la santa republica francesa, en berbèrs a las Canàrias, ... es una idèa estranha car quora aquel mitan politic pensa en lenga de fusta, o fa sense cremar las efigia del generalíssim Franco, mas en los brandir coma exemple de netejament lingüistic, devath l'idèa simplassa : «en España se habla español» (modèl franquista), e sabèm nosautres qu'avèm l'equivalent jacobin : «en France on parle français», puèi en «Itàlia se parlariá l'italian», puèi en «Belgica se parlava lo belge», coma se en «Confédération Helvetique certains parlaient le confederationhelvetiquois» (mantunes «lingüistas» estanusians son a la recèrca, per nos montar un polit article en anglés, sense aver daissat lo burèu universitari d'oltra-atlantic) o dins «l'ex-URSS, on parlait l'ex-URSSien» !

Es clar que lo problèma qu'an aquel tipe de concepte politic, es de pensar subre l'ignorança de la diversitat umana en se basar sus la coneisséncia del sègle XIXen al XXIen ! Es una pensada que considèra un Estat = una lenga, etnisme. Son estupiditats del sègle XIXen, aquelas que faguèron la basa ideologica dels Nazis.

Aquela ideologia avança en recuolar, mas coma nos vòlon enbicar tot en nos far pensar que son idèa d'abans-guarda ?

La question pausada per l'Internauta («per què les cartes dels restaurants no estan en valencià» alara que totes los politicans del Partido Popular se díson valencians e díson far una politica pel valencian, ça díson), la question es çaquela intelligenta : perqué o son pas, los menús en valencian, los qu'el a la costuma de veire ? - per abséncia de politica lingüistica (pro sovent en PV, tot especialament tanben en Occitània), - per ignorança del restaurant sul tèma lingüistic en zòna toristica o pas (perqué un torista li agradariá pas d'aver lo menú en occitan de Tolosa, Bordèu, Niça, Marselha o Avinhon, o catalan de Castelló, Valéncia, Alacant, Elx ?), - per incompeténcia gastronomica e formacion dins las escòlas professionalas mal adaptadas al mercat que respecta pas las diferéncias cosinièras.

E sobre totas aquelas ignoranças, l'extremisme regionalista d'expansion madrilenca, o parisenca, se plaça aisidament.

La Razón trabalha son òrt expansionista espanhòl.