las entrevistas calandreta lo caminòl

Avèm fait las entrevistas de calandreta Lo Caminòl dins la comuna de Pena d'Agenés, Sant Martin de Calhas, sus la rota de Sant Vite.

La president èra sul mercat païsan de Frespuèg. 

La parenta e la president èran a un taulet qu'ajuda a finançar Calandreta.

Las entrevistas son de Jacme Delmas, Tolosa-e-Pena, e lo montatge e la tecnica de Joan Pau Capdecoma, Lairac; son volontaris e pas bric pagats per aiçò far.

Es un canal YouTube que prepausa entrevistas e vídeos ligats a la vida de l'occitanisme del XXIen sègle.

_°_

 

Passejada occitana ambe lo canal YouTube HDP entre Vilamur e Frespuèg

A Vilamur i sèm estat per enregistrar una vídeo la conferéncia en francés sus 2700 ans d'Istòria d'Occitània ; Jordi Labouysse es reconegut coma especialista e istorian d'aquela Istòria d'Occitània ; nos presenta una pichoneta partida de son trabalh dins una conferéncia dels « 2700 ans d'istòria d'Occitània », una ora trenta, la publicacion sul net serà longa ; lo títol èra en francés plan segur, enfin per malastre, car lo public que parla sonque francés es un pauc intolerent lingüisticament, ne farai la pròba dins un bilhet enseguida sus l'occitan en Garona Nauta ; la vídeo de la conferéncia serà presentada aquí dins doás setmanas. Mas aquela conferéncia debutava una jornada Occitània a Vilamur, pel primièr festenal de musica de la vila occitana, mas « fau èstre dubèrt » (sempre l'entendèm e segur es estat prononciat en reünion a Vilamur per l'organizacion del tot), es mesclat ambe las musicas del monde; las colors occitanas èran de sortida (la bandièra del Lengadòc); l'ofici de torisme a sortit la pichoneta bandièra de la novèla regiona administrativa (estonent non, veire bilhet següent), mas perqué far aquela jornada un divendres ? la question damora e es estada pausada per Jòrdi Labouysse. Ne fau aquí un relai militant.

 

 

Lo temps èra triste e nos frenèt pas çaquelà per dintrar dins l'engranièra del rei, grenier du roy, polidament transformat en centre de cinèma e de conferéncia, e segurament tanben en empont per d'espectacles de teatre (s'i espèra lo teatre occitan ... idèa !).

L'engranièra del rei, èra l'ostal de l'anciana fiscalitat dins un vilatge que lo rei n'aviá besonh car lo vilatge èra protestant ; l'engranièra donava moneda al rei e al meteis temps parlava mai que d'autres vilatges o vila d'Occitània, la lenga de l'edicte de Villers-Cotterêt, lenga politica del rei, del centralisme franc, puèi francés, puèi republican.

Apuèi sèm estats, dos militants o volontaris de l'occitanisme del XXIen sègle, a Frespuèg (Agenés, Occitània), per una autra fèsta occitana de cada divendres, lo mercat païsan del país de Sèrras (las «montanhas» de l'Agenés, pichoneta, mas en bicicleta los pompilhs ....) Ailà avèm entrevistat doás femnas valentas per apitar una Calandreta en monde rural, en Valèia d'Òlt, e tanben dins un país qu'es estat pro protestant abans los chaples del rei franc.

Avèm entrevistat la presidenta e una parenta, per l'escòla Calandreta de Sant Martin de Calhas, Calandreta Lo Caminòl, long camin dempuèi Vilamur, 1h30 de camin sense tradar ... mas sèm dins la linha clara dels circuïts que los protestants an agut de percórrer per se defendre contra l'integrisme reial francés, integrisme que suportèm ara devath la linha del netejament lingüistica, politica francesa simbolizada per l'article 2 de la santa constitucion dels jacobins.

Fau notar que los organizadors occitanistas del mercat païsan (privat e de granda renommada) de l'Agenés, son a preparar la fèsta occitana de la debuta d'agost ; ai aurelhat que los musicians e cantaires auràn pro de qué minjar ....

Las entrevistas especificament Calandreta seràn publicadas dins doás jornadas sus aquel quite blòg, gràcia al canal HDP sus YouTube....

Benlèu que lo canal HDP sus YouTube anirà tanben a la « mèi grana hèsta d'Occitània » (en agost) a Pau en Bearn, o sabèm pas fins ara...

 L'ofici de torisme ne farga la publicitat en lenga francesa... e quitament en lenga francesa, sabètz qu'aiçò es un combat militant de cada jorn !

Calandreta en Valèia d'Òlt, enfin !

Tres jorns en Agenés, aprèp un article dedins La Dépêche du Midi, e jà se ne parla dins la comuna de Pena d'Agenés ! Lo títol de la DDM me semblava pauc clar, ara ai comprès, un vesin es passat a l'ostal de familha e la causa ameritèt comentaris, parladissa ciutadana. L'informacion tanben se passeja aital, e sembla que se parla pas pro de l'occitan dins la ciutadanetat, mentre que las guerras jacobinas se fan entre lo cantaire Cali (adfidat a la retorica de l'embarrament universalista francés) contra la dubertura occitana del grope Nadau, dedins una fèsta occitana devenguda comunala, aquela de la comuna de Rodés ; a Rodés se dona que la comuna, los elegits e son administracion, vòl donar leiçon republicana de dubertura al monde als « païsans » que se díson occitanista.

Ben justament, lo comuna de Pena d'Agenés s'engatja mai fòrt e ambe mens de bruch... mens de moneda tot parier.

Soi assabentat per un vesin que lo cònsol de Pena d'Agenés a fait un bon afar, a trobat un locatari per l'escòla de Sant Martin de Calha (escòla barrada e sense usança, dins un mitan rural que se despòbla), « l'escòla occitana [ ....] amb un projecte que li paga lo departament un emplegat».... se ne parla ; mas la precision es pas a l'arribada, a la basa de la conservacion ; mas se ne parla.

Car es plan Calandreta que s'installa a 4 km de l'ostal de familha.

L'escòla bilingüa (occitan / francés) es plena, e a 4 km tanben ; mai d'un centenars d'inscripcions cada annada.

L'escòla dita occitana, Calandreta novèla es donada coma aquela de « Vilanuèva d'Òlt » comuna d'esquèrra, 9km, que refusa Calandreta sus la comuna, per li trobar pas un bastiment, e çaquelà i a una crisi del bastiment a Vilanuèva d'Òlt (o fau escriure, sus 10 ostals, 1 es a vendre).

Donc per clavar, aprèp ma candidatura vièlha, primièra dins lo canton e del departament (Unitat d'Òc - Entau País), lo canton de Pena d'Aganés aurà una escòla bilingüa (plena) [fau felicitar dòna Gisèle Graf que se felicitèt del projecte primièr, ara defuntada, e que èra pas tanpauc sa cultura ni sa lenga (!)], una calandreta que debuta en 2017 (enfin!), e un cicle pel collègi (gràcia a una militanta del POC, ara defuntada). Cada còp o devèm a la decision politica, del terrenh, e plan segur, fòrtas prepausicions ciutadanas ; mon implicacion es pichonèla (una candidatura a 4 % dins la comuna dins las annadas 1990 (!), donc o fau dire, son estats ètz jorns de vacanças per far campanha en bicicleta, sense cap pollucion, e candidatura isolada sense sosten dels occitanistas de l'Agenés).

Lo cambiament de generacion es tanben una fòrt bona causa per l'occitan, la vergonha s'en va.

Aqueste maitin soi content, la densitat de l'ensenhament de l'occitan dins lo vilatge del poèta carcinòl en Pau Froment a aumentat al XXIen sègle, la densitat comença d'èstre al nivèl que fau per recuperar la lenga, la densitat es mai granda qu'a Tolosa, Bordèu o quitament Peirigüers o Agen, Marmanda o Cáurs, Tonens o Lemòtges, Baiona o Montalban.

Ara fau una signaletica clara, e normala.

 Lo primtemps de Pena d'Agenés es estat un moment de grand òbra per l'occitan e Calandreta, setembre serà una dubertura novèla. FELICITACIONS.

Pauc a pauc a Pena d'Agenés, la ciutadanetat saurà l'importança de l'installacion de « l'escòla occitana » e diràn lèu Calandreta !

Pauc a pauc l'escòla ciutadana occitana, Calandreta, viurà una longa vida en companhiá de l'ensenhament d'Estat al Pòrt de Pena.

Pena d'Agenés serà per fin una granda ciutat per l'occitan, pas sonque poètas suls emponts.

OPLO : remesa del prèmi Jan Moreu a calandreta La Lobèra

Un divendres al ser de junh 2017, èra la fèsta de fins d'annada de Calandreta dins l'aglomeracion de Tarba, aquel vrespe especial Calandreta recebiá lo prèmi Jan Moreu per causa d'inovacion, la creacion d'un CD ambe los Calandrons de l'escòla, e lo prèmi ajudarà a la publicacion del CD.

M'a semblat important per mantunas rasons de sortir de la val de Garona per anar veire sus plaça ; avèm entrevistat la presidenta elegida de l'OPLO, mantunes parents de l'escòla e la directriça. Traparètz aquí las entrevistas.

Fau notar qu'èran presents lo cargat de mission de l'occitan al Conselh Regional de Novèla Aquitània, e tanben lo director de l'OPLO, e de la presidenta de l'associacion para-publica Ofici per la Lenga Occitana. Se debanava dins la region administrativa Occitània, en l'abséncia d'elegits del Conselh Regional de Tolosa... Benlèu qu'Ibòs es luèn de Tolosa per i poder delegar un representant ?

Ibòs es conegut en Bigòrra per las seradas de Cants d'Ibòs ; una implicacion granda que faguèt que Calandreta i installèt sa fèsta de fin d'annada.

Anuèit èra especial per recebre lo primièr prèmi Jan Moreu de l'Ofici per la Lenga Occitana. L'objecte del prèmi èra l'inovacion, Calandreta donava pro dins la musica per i gravar un CD, que serà publicat en fins d'annada ; lo prèmi ajudarà financiarament a l'edicion.

Avèm entrevistat la presidenta de l'OPLO. Coma mèdia interessat per aiçò, pauc, La Dépêche du Midi, coma eveniment local, lo localièr èra present, pauc mèdias al entorn del ministèri de la cultura, çaquelà l'OPLO es causa del ministèri de la cultura, non ?

Es una entrevista politica, o fau dire la politica per l'occitan es una causa POLITICA ! Malgrat çò que los politicians an demandat a l'IEO (IEO06 tanben) de portar sul tèma « sense politica », dins un grand concènsus ipocrit e jacobin ; la politica lingüistica es una causa politica pel francés (article 2 de la constitucion) o per l'occitan (per egalitat republicana) es tanben de politica, la pròba per aquela vídeo que podrà avantatjosament mandar a totes los militants antipoliticas de l'iEO e del Felibrige; quand soi espantat per aquela vision de la politica !

 

1/ Charlina Claveau Abbadie, elegida en carga de l'occitan al Conselh Regional d'Aquitània, es tanben presidenta de l'OPLO, Ofici per la Lenga Occitana ; entrevistada a Ibòs (aglomeracion de Tarbas) ; nos explica que « l'occitan e la politica per l'occitan es l'afar de tots »

Presenta a Ibòs aquel divendres per la fèsta de Calandreta ; èra tanben aquí, per donar lo prèmi Jan Moreu, «prèmi per l'inovacion», a l'escòla Calandreta de l'aglomeracion de Tarba.

2/ Jean-François Carilhon, parent d'escolans de Calandreta, es tanben un pont entre la Calandreta dels Pirenèus e la plana de Garona mai enlà, cap a l'Agenés ; entrevistada a Ibòs (aglomeracion de Tarbas) ; nos explica tanben que « l'occitan e la politica per l'occitan es l'afar de tots »

Present a Ibòs aquel divendres per la fèsta de Calandreta ; Lenga e identitat, dels Pirenèus a la Val de Garona, li sembla coërent.

3/ Amelia Lasserre, parenta d'escolan de Calandreta ; explica l'implicacion dels calandrons dins las causidas de pedagogia dedins Calandreta ; nos explica que « l'occitan e la politica per l'occitan es l'afar de tots », especialament, coma per ela, per parents d'escolans qu'an migrats en Occitània dempuèi la region parisenca.

Nos explica tanben la manièra que sos enfants li an donat lo vam per apréner l'occitan, en partir de zèro, mas ambe una granda volontat dedins la familha, entre Bearn e Bigòrra.

Presenta a Ibòs aquel divendres per la fèsta de Calandreta ; la Calandreta de la Lobèra.

4 / Corina Orlac, directriça de Calandreta  la Lobèra; Nos dona una fotografia de Calandreta dins l'aglomeracion de Tarba ; Nos donarà l'implicacion dels elegits per aquela escòla laïca de Bigòrra, e tanben las solidaritats entre las Calandretas ; mas tanben la fauta de politica lingüistica e dons d'argent per desvolopar aquelas escòlas.

Aital s'acaba la visita a la HÈSTA DE CALANDRETA de Tarba, La Lobèra. 

Lo 21 de julhet s'inaugurarà L'Estivada, un mesclum que i serà lo tot-personal politic del Conselh Regional e de la comuna de Rodés, e segurament lo Conselh Territorial de Roergue; per la remesa del prèmi Jan Moreu, de l'Ofici per la Lenga Occitana (sièti tolzan), los elegits de la region Occitania èran absents ; la Bigòrra dèu èstre pro luènh per i aver bona representacion d'elegits del Conselh Regional ? 

Fèstas d'estiu per l'occitan

Pampaligossa se debanarà lo dissabte 8 de julhet, 14h, sobre la prada del pont canal d'Agen.

Organizada pel tresen còps per l'associacion Per Doman, la fèsta Pampaligossa es un festenal de familha, ludic e creatiu ; l'objectiu es de perpausar un temps e un espaci de léser, d'encontre, de juecs e de creativitat.

Segond enjuec, es la descobèrta de la lenga occitana que pòrta una cultura particulara ; se farà aital de manièra dolça. Agen se vòl al còr d'Occitània (la granda), ambe sa lenga emplegada aquí dempuèi 14 sègles ! E fau apondre que mantunes documents ne fan la pròba, document ESCRITS ...

-°-

D'un autre costat d'Occitània, a costat de Montpelhièr tanben fan pinha per aver una visibilitat per l'occitan.

 Es precisament a l'entrada de Montpelhièr, un endreit famós per una manifestacion per la signaletica en occitan, a vilanova les maguelona ; divendre 7 de julhet se presentarà un espectacle en viu ; los organizadors lo faràn excepcional, car pel primièr còp dins la ciutat, al pè de la catedrala famosa.

Beucòp d'umor e d'enèrgia militanta per aquel concèrt faràn parodias e creacions, cançons e musicas en Occitània, portada per la musica ròck'n ròll per aver la nhaca !

Christian Almerge, cantaire occitan, convida, ambe lo grope TEST, per un viatge cròs la fantasiá e la descobèrta, esmovent pel public. Se debanarà lo 7 de julh a las 21h30 prèp de la comuna de la vila de l'Erault en Occitània administrativa francesa.

Entrada liura e a gratís ; se beurà per amistat aprèp lo concèrt !

 -°-

Puèi Vilamur, Garona-Nauta, Occitània, pels agèndas de cadun, de notar la jornada occitana del 28 de julh.

De notar la conferéncia d'Istòria d'Occitània a las 11 oras, lo 28 de julh a Vilamur.

 -°-

Vasatz Novèla/Navèra Aquitània, la lenga tanben es presenta per l'estiu 2017, per l'estiu hen hèsta en Vasadès.

 -°-

Puè fau pas oblidar en Arièja, lo festival occitan Festen’Oc d'estiu començèt dissabte 24 de junh per un bal pels enfants pèi la serada de Sant Joan e contunha lo dijaus 13 de julhet per 4 jorns de fèsta, de musica, de danças, de cants ... informacions mai grandas sul ligam.

Es un grand festenal engimbrat pel monde associatiu, bravament luènh de tota manipulacion politica.

Grops concèrts e bals  :

            24/06 : Parpalhon, Les Irètges

            13/07 : La pèiro Douso, boisson Divine

            14/07 : lou Davi, Branka bodegaires, le Bal Brotto-Lopez, Lou Tapage

            15/07 : Les Irètges, Lou Seriol, GoulamaK Les Diables

            16/07 : Arredalh, Tuk Tuk

 Lo programa sancièr en ligam aquí.

Collègi Calandreta dins un recanton de Tolosa

Gaire luènh de l'avenguda de la Glòria, aquelas victòrias de las armadas napoleonianas, lo collègi Calandreta s'es installat ; l'installacion es estada possibla gràcia a un conjunt de volontats politicas, Jean-Michel Lattes e l'elegida en carga de l'ensenhament de la municipalitat actuala de Tolosa, la politica novèla del Conselh Territorial (ancian Conselh General), la volontat politica del CR que vòl una filiara per immersion ambe l'occitan, coma exista jà per l'alemand dins l'aglomeracion de Tolosa (ambe mens de problèma dedins lo sistèma educatiu d'Estat).

Per l'inauguracion del Collègi Calandreta, lo grand absent èra l'administratiu del sistèma educatiu d'Estat, autanplan laïc e a gratís que lo sistèma educatiu Calandreta (pareis). Se confirma encara que lo sistèma educatiu d'Estat es incapable d'auto-critica sul subjecte de l'occitan, e de l'ensenhament per immersion; fan mens de problèmas per l'ensenhament en immersion de l'alemand en l'aglomeracion de Tolosa...

Jà a l'inauguracion, e vist lo succès de las inscripcions, aprèp quasiment dos ans d'existéncia, lo collègi Calandreta e l'associacion indica que cal pensar a un autre endreit mai bèl per devolopar la filiara d'ensenhament per immersion lingüistica ; lo Conselh Territorial es avertit, caldrà preveire de dintrar aquel collègi abans la reconéisser per l'Estat. Seràn al nivèl ?

La preséncia politica granda del Conselh Territorial, ambe lo seu president, sénher Méric, anóncia una responsa positiva ; cal notar tanben que l'elegit en carga de l'occitan èra tanben present (una entrevista pareisserà dedins aquel blòg lèu), en companhiá del novèl cargat de mission per l'occitan. Al Conselh Territorial i a una politica visibla per l'occitan, per un occitan coma una «aisina de la laïcitat republicana» e «la diversitat culturala e l'ingüistica del departament».

Es la comuna de dreita, Jean-Michel Lattes e la cargada a l'ensenhament, qu'an trobat l'endreit, pauc emplegat dins una escòla del barri Bonhoure-Sopatard, cal traversar l'avenguda de la Glòria e l'avenguda qu'aquela terrassa sus l'Èrs (luòc que dona l'esquina a la vièlha vila, e donc que l'esquèrra a pas agut l'astre de saber qu'existava). Es un pichon recanton a l'accès de mantunes projectes immobilièrs, un endreit que la creissença en populacion jove fabrica un grand avenidor per aquel luòc; fau notar que mai de 5000 personas per an i arríban. La populacion del barri es en creissença, pòrta una polida part a la creissença de la vila de Tolosa.

Es Calandreta, una associacion laïca, una associacion per un ensenhament a gratís ; alara perqué la creissença de Calandreta es pas un modèl per l'ensenhament dit «Éducation nationale» ? La responsa la tenon los elegits tanben... Mas l'Estat es mai complicat, lo mamot es lentàs quand se parla d'ensenhament dit public.

Quand Calandreta creis, lo sistèma d'Estat tanben, mas bravament mens aviat, amb la lentor del mamot nafrat. Mas l'utopia d'un sistèma educatiu d'Estat, perfait (qu'existís pas, e o existarà pas jamai), es una utopia que Calandreta pròva en realitat, de vertat.

Fau notar que Calandreta es sempre capdavancièr dins l'ensenhament de l'occitan, a Tolosa, a Montpelhièr, a Narbona, a Carcassona, a Pau, e quitament en Lemosin ambe una sola pichona escòla; justament ont Calandreta es flac, l'ensenhament de l'occitan dins lo sistèma d'Estat es mediòcre (Lemosin, Auvernhe, Provença, Niça).

Jà los politicians tolzans son prevenguts, lo Collègi Calandreta a Tolosa es dins un endreit pro prichonèl, caldrà trobar solucion per un albergament dels escolans de las sortidas del primari dins la region aprosmada de Tolosa. E lo projecte collegian dintrariá dins l'ensemble immobilièr que l'Estat daissa a costat ? E lo projecte licean -cridat tanben- dintrariá dins l'ensemble immobilièr que l'Estat (ministèri de l'armada) daissa a costat ?

Lo cargat de l'occitan al Conselh Regional, l'elegit Patric Roux (present sense lo seu cargat de mission), assegura que lo Licèu es un objectiu de Na Carole Delga, presidenta de la futura region Occitanie.

Lo concensual es un element màger per la capitada Calandreta, sense parent, Calandreta exista pas, sense lo concensual politic Calandreta «trantalha», capdavanteja ambe dificultats ... alara la pelòta es plan dins lo camp del succès, se lo concensús viu, lo camp de succès es una filara Calandreta, exemplara.

Lo discors del President del Conselh Territorial de Nauta-Garona èra largament esperat e foguèt plan estimat, plan valorizat coma un grand e novèl espèr pel desvolopament de las escòlas «laïcas e gratuïtas» Calandreta per bastir «una filiara de qualitat per l'occitan».

Jean-Michel Lattes m'assegura : « ambe la dubertura oficiala de La Topina a l'Ostal d'Occitània, e del Collègi Calandreta, es una granda setmana per l'occitan a Tolosa», la preséncia de Bertran de la Farge, juste sortit de l'espital, pròva qu'es vertat ; Bertran de la Farge es estat lo primièr elegit en carga de l'occitan a la comuna de Tolosa. Me sembla qu'amerita d'inaugurar la dubertura del novèl Collègi (mai grand) e del Licèu previst, e benlèu portarà lo seu nom ? L'idèa es lançada !

Manifestacion per ajudar Calandreta

Crida lançada diluns passat, a las 13h del maitin a Tolosa, per una manifestacion al pè del Conselh General, los parents e escolans, mantunes militants, son arribats valents (dins lo freg) per manifestar ; èrem un dimècres a las 9h del maitin, mai o mens 90 personas e la premsa escrita e audiò. I aviá pas cap elegit. Ai recebut un bilhet del Martin Malvy, lo secretariat, per se desencusar de non poder venir.

Vist que lo cargat de l’occitan (un elegit) es pas estat remplaçat al Conselh General de Nauta-Garona, la situacion de Calandreta es mesa en dangièr, per una decision politica e administrativa (sense arguments e pauc discutida democraticament), la decentralizacion ajuda pas Calandreta ; lo clientelisme sembla èstre lo sol mòde de govèrn dels elegits de la decentralizacion.

Fautava los actors de l’ensenhament d’Estat, per l’occitan.

Calandreta : la politica de l’austruga

Las escòlas Calandreta son d’escòlas per immersion lingüistica, es la nòrma europèa per l’ensenhament de las lengas. Es per aiçò que recebrà jamai lo sosten de tot lo sistèma francés d’ensenhament, universitats franceses compresas, entitats que son formatadas al nacionalisme francés, ne fan sense saber, coma mèstre Jourdain la pròsa.

L’afar de la Calandreta de Lemòtges pròva mantunas causas :

1 / las leis francesas serà jamai adaptadas a las donadas umanistas d’aquesta planèta, malgrat la compassion que pòt aver un sistèma politic francés en Occitània, e que serà sempre nimoritari dins lo sistèma republican francés. La «Libre Pensée» e sos ciutadans an rason far aplicar la lei. Mas las leis francesas son nacionalistas francesas, expansion lingüistica. Farai cort e m’arrestarai aquí dins los comentaris juridics, pel passat. E aprenèm dins lo jornal, dins Le Populaire, alavètz, Calandreta remborsarà : quina estupiditat !

2 / la federacion Calandreta, e l’associacion lemosina, aprèp aver donat dins lo silenci, un silenci de doás annadas qu’auriá daissat lo temps de cridar o manifestar pacificament a Lemòtges, es forçada al grand jorn de l’afar ; mas la responsa marca la mediocritat juridica del sistèma occitanista, es pietadós mas una causa istorica, regulara. Sembla èstre l’avejaire dels plega-esquinas que fan las direccions diversas de l’occitanisme d’anuèch, Calandreta a Lemòtges particularament.

3 / cridar al drac occitanofòb e non donar una responsa juridica e ciutadana al jutjament, es tanben irresponsable, e pòrta aital un còp segur a tota convivència ambe un sistèma popular que pòt acceptar un occitanisme digne. Es lo crit de l’extrèma-esquèrra que vòl assegurar que lo sistèma es pas reformable, l’aumentcion del nombre de militant e un discors extremista de sempre, sense aver assajat una manièra intelligenta e juridica de procedir.

Ara, la constatacion estent faita, que cal far, o que cal pensar per poder avançar e non pas coma l’austruga metre lo cap dins l’arena lemosina irradiada de la compassion politica lemosina, del nacionalisme francés light in Lemosin.

Lo dreit es pas una causa que se non pas pòt cambiar, vaquí tres manièra per resoldre lo problèma de nacionalisme francés en Lemosin, tot en pensar que lo jutjament de Lemosin, coma es en França, farà jurisprudéncia (per los de Calandreta e l’occitanisme qu’o vòl amagar) :

1 / la lei francesa se podrà votar, mas jà sabèm que la lei gastarà temps per arribar vist lo sistèma tortuós que pòrta la Vena republica ; cambiar de numèro de republica es gaire possible de pensar que cambiarà bèl còp de causa. (solucion del sistèma politic francés en Occitània). Sembla que dire aiçò, basta per aver un resson politic dins la boca del president del PNO… l’incompeténcia juridica occitana es sempre revendicada coma un acte de nacionalisme occitan, levat sus l’etnisme. L’especialitat universitària ‘literatura e politica’ matarà la lenga occitana. Lo jutjament de Lemòtges farà jurisprudéncia, es normal vist que los Occitans an abandonat de fabricar las leis lo 22 de setembre de 1792.

2 / integrar Calandreta dins lo drac, lo mamot nacionalista d’ensenhament modèl Jules Ferry, es lo modèl de la FELCO qu’es plan silenciosa sul tèma de la justícia nacionalista francesa en Lemosin. Sabèm qu’es un sistèma que los parents, fondators de Calandreta, auràn jamai interès d’aver perqué l’escòla de la republica, coma l’explica mantunes especialistas ontologics a l’E.N., es jamai estada bastida perqué los parents intervenguèsson. (Solucion La Setmana, a la pichona setmana, solucion Ràdio País) ; la FELCO a res contra Calandreta, mas cada vagada que se trapa, se trapa dins lo camp dels ciutadans de la «Libre Pensée», lo camp nacionalista francés, lo camp de las formacions universitaris francesas sul tèma «langue d’Oc» en Occitània ; se trapa dins lo camps dels liures cantaires socialistas d’Agenés que fan la guèrra a Calandreta, e als parents de Calandreta ; e l’occitanisme agenés contunha d’acceptar las sonçainas socialistas, las incompeténcias socialistas, dins los discorses oficials per l’inauguracions mortualas (i a una vídeo que se passeja sul net). Mas integrar Calandreta aquí dedins facilitarà pas la formacion dels professors, vist que lo monopòl de formacion èra petat per rason de la particularitat juridica de Calandreta. E dins lo sistèma actual de l’universitat francesa, las formacions dels professors es pas bien adaptadas a las necessitats de reconquèsta lingüistica occitana, bravament pas. es benlèu per aiçò qu’aquelas formacions recebon subvencion del sistèma de la decentralizacion ( quí sap ?) ; la perversion es umana.

3 / contunhar la procedura juridica dinca Luxemborg, sonque los juristas sapients sábon l’interès d’aiçò, per cambiar las leis francesas per la fòrça e non pus per las man-òbras dels plegas-esquinas costumièras e occitanistas, e ne manca pas per explicar que «toi tu n’as rien compris» dins una conversacion tot en occitan. Aquò me remembre un jorn de manifestacion a Bordèu, dins la annadas 1990, que lo president del defuntat Sindicat Occitan de l’Educacion m’a confirmat que refusava l’intervencion d’un «huissier» de justícia per condamnar l’administracion que, segon lo mesme president, «non respectava, en République française, los decrets d’ensenhament de las langues régionales en Aquitània» ; per castigar lo sistèma, val melhor èstre fòra del sistèma, vertat ; l’«huissier» èra dins lo grope dels parents que visitava lo rector….Tronam en Lemosin,  un jurista sab que Luxemborg podrà far condamnar França a la reforma vertadièra, pas l’extrèma-esquèrra (Lo Jornalet). Anar dinca Luxemborg, es possible dinca n’acabar ambe totas las proceduras francesas, gastarà mens de temps que los dos ans de silenci de Calandreta en Lemosin, e costarà coma un investiment per l’avenidor, per evitar la politica dels plegas-esquinas, es benlèu una politica qu’es desirada per l’occitanisme, per far contunhar lo clientelisme associatiu e politic francés en Occitània ? E se aiçò se far, l’espèri, podrèm aital dire que Lemosin es pas sonque causa dels Trobadors, mas causas d’un occitanisme colhut e qu’a cambiat, al XXIen sègle, las vias de mòrt de l’occitan ensenhat en França. Soi pas segur çaquelà que l’occitanisme del XXIen sègle ne servèsse aquelas capacitats de fiertat politica.

Per non far l’autruga, preferisqui de non pas èstre membre d’una associacion d’occitanistas, me semblan autanplan dangierós per l’occitan que la «Libre Pensée». Es pietadós, mas son 30 ans d’occitanisme, en practica, dedins e defòra d’aquel occitanisme.

Mas contunharai de defendre l’occitan, sa dignitat, un èime del pòble d’aquí, malgrat tot nacionalisme francés, de la FELCO-Calandreta a la «libre pensée» de Lemosin.

Calandreta tornarà a Agen lèu

Aquò es un regret bèl, los frens internes a l’Éducation Nationale avián empachar lo desvolopament de Calandreta a Agen, aquò farà mai o mens de 20 annadas.

Aqueste vrespe una novèla acaba de tombar, la dubertura de Calandreta a Agen serà possibla, enfin.

Vaquí las novèlas, cortas mas esperadas :
- Cinquantas ciutadans de la vila an respondut a la crida de soten al projecte e son inscritas al comitat de sosten.
- 9 dròlles podrián far la dintrada en setembre, que dos an 5 ans, quatre 3 ans, e tres de 2 ans e mièg.
- Dempuèi la debuta del projecte, lo cònsol Dionis du Séjour aviá ajudat al desvolopament.
- La presa en carga del salari de l’ensenhant es estat votat e budgetarizat per la federacion regionala d’Aquitània, a partir de 2013.
- La Federacion Regionala trabalha per recrutar un regent per Agen ; i a jà tres candidaturas. E cerquam del nòstre costat...
- Cerquam tanben activament mantunes locals, e questionam regularament las collectivitats localas (Conseil Général, Comunautat d'Aglomeracion d'Agen, Comuna) e tanben d’autres actors (SNCF-RFF, proprietaris privats...)

L’associacion demanda ajuda, idèa, pensada sul tèma.

Manifestar a Vilanòva de Magalona

I aurà sobre aqueste bilhet un comentari sul tèma (mai de 500/700 personas per una manifestacion decidada vaquí quinze jorns, lo cònsol Segura de Magalona e son Conselh Municipal pensaviàn pas despertar tantas solidaritats vengudas d’en pertot en Euròpa, e cal perseguir la solidaritat entre las nacions mesprezadas, contra lo nacional-expansionisme francés), mas primièr, unas felicitacions politicas a la preséncia dels deputats europèus a Vilanòva de Magalona.

Cal felicitar Catherine Grèze per èstre venguda defendre, non pas un espanhòl parlat dins lo SO coma se parla dins los burèus de Brussèllas, mas la lenga istorica e ortografiada dempuèi 950 en Occitània, una lenga pont de la latinitat, la primièra lenga europèa del continent, la primièra lenga de las matematicas modèrnas de l’Euròpa occidentala, la primièra lenga de la medecina, la primièra lenga de la literatura, de la laïcitat, etc.
Ara, cal mai que defendre la lenga, la cal EMPLEGAR per tornar la dignitat ; es un problèma politic real e franchimand, per contrar lo nacionalisme d'expansion francesa.
Cal notar l'abséncia dels deputats europèus socialistas, Front de Gauche et MoDem, totes an fait jà una marca que fonda una politica d'abandon lingüistic en crear una abséncia, aital son solidaris ambe los deputats UMP del Parlament Europèu.
Cal dire als electors e a las electriças d'Occitània ont es la realitat del sosten lingüistic, cal èstre clar, SONQUE Europe Écologie participa a la dignitat de la lenga occitana.
Es evident qu'esperèm pas una venguda dels Còrses per defendre l'occitan, es important que los OCCITANS se prenguèssen en man. Mas cal felicitar los Bretons, Alsacians, Flamands, Catalans, Savosians, Martiniqueses, Goadelopeans, etc. que pensan que promòure l'occitan es tanben promòure totas las lengas.
Mas PRIMIÈR es als ciutadans franceses d'Occitània, ALS OCCITANS E A LAS OCCITANAS de se prendre en carga e d'esperar pas una lei per despertar una lenga soca de la realitat culturala europèa.

Ne podrèm saber mai ambe l’article publicat per l’EITB aqueste vrespe, una urgéncia basca tanben, aquesta manifestacion occitana.

Una medalha deurà èstre donada als militants nacional-expansionistas franceses tal lo Hadjadj per aver portat un planh agradat per un tribunal francés e administratiu d’aver despertar la realitat francesa, es lingüiscdària (podèm pas escriure mens). Es un dangièr europèu.

Lo sistèma politic en Occitània debuta lo camin de Damàs, aprèp aver pensat Leonina Societas… Sèm ara sobre un camin de recèrca de la dignitat occitana, e la visibilitat occitana es essenciala, enfin.

La promocion de la diversitat lingüistica es un problèma que concernís totes los ciutadans totas las ciutadanas, e especialament los ciutadans europèus, ÒSCA a-n aquesta neerlandesa d’èstre venguda manifestar per l’occitan.

 

Sobre la pòrta ai poscut fotografiar una partida dels manifestants, puèi son estats a l’entrada de la vila lengadociana, per protestar contra lo ridicul que pòrta una lenga occitana dicha accidentogèna segon un tribunal administratiu de Montpellier, en designar clarament los frens per la democràcia en Occitània, l’ADMINISTRACION FRANCESA. E donc, alara lo problèma es devengut politic, CAL UNA LEI PER L’OCCITAN e una ADMINISTRACION OCCITANA PER LA GESTION DEL NÒSTRE PAÍS, OCCITÀNIA. Catherine Grèze zo diguèt, se cal encara felicitar d’aiçò, per la clartat del devís e la volontat de preséncia per zo dire, directament als militants venguts sosténer la municipalitat, per la dignitat manténer.

Sembla qu’an comprès, lo sistèma politic de tot bòrd, èran presents e nos cal felicitar d’aver poscut mobilizar aiçò, mas ara cal èstre seriós e pensar grandament a una lei per l’occitan, lo principal problèma es l’UMP, lo FN, lo Front de Gauche e mantunes elegits socialistas jacobins (per exemple lo cap de lista europèa e socialista Kader Arif o lo deputat Bapt de Balmars). L’abséncia del MoDem a Vilanòva de Magalona es tanben un problèma politic pel futur, ont es lo deputat europèu Rochefort ?

A la seguida podrètz gaitar una vídeo sul tèma.

Quora las institucions europèas castigaràn lo govèrn francés per aver destrusit lo patrimòni universal de las lengas europèas ?

Lo Lemosin, l’Auvernhat, lo Lengadocian, lo Gascon, lo Provençal, lo Nissart, lo nòrd-occitan (Dalfinat), lo Bearnés, lo Bigordan son totes una version enriquidoira de la lenga occitana. La pluralitat de las versions occitanas frena pas la lenga, mas simplament la nòrma ajuda a un dinamisme lingüistic. Cal apondre aquò per rason del discors entendut dins la vídeo de Midi-Libre.

De legir totparier, aquesta tribuna dins Segre en Val d’Aran, o l’article dins El Triangle. Amai, lo Sud gaita lo Nòrd e l’explicar al Sud (Catalonha), es aital que podrèm tanben legir lo bilhet de Farri.

E uèi lo jornal regional-expansionista francés dona dins la nacional(ista)-erronia :

 

Libération es aital dins lo camp de l’extrèma-dreita franchimanda, del nacionalisme sense complèxe. E coma zo podèm exprimir, es simpla : quora dins los comentaris se trapa un per explicar que l’occitanisme es d’extrèma-dreita perqué un occitanista auriá estat del costat del Pétainisme, quantes Franchimands d’aqueste costat ? Libération i seriá estat ambe nacional-ironia …

Nouvelle République (AFP), Le Point, Télé Miroir (dos), Le Telegramme, … son pas sobre aquesta via, vòlon encara parlar d’Occitània sense aver d’èstre castigar per manipulacion politica, per manipulacion regional-expansionisme parisenca.

Podèm aital legir sobre la pagina de l’Agence Bretagne de Presse, lo comunicat del Partit de la Nacion Occitana, en francés, e melhor entendre la diferéncia entre nacionalitat e ciutadanetat, per los qu’an legit Cornelius Castoriadis, seminaris difusats sovent per France Culture, o vièlh professor de l’EHESS, e ara defuntat (segurament pas conegut dels jornalistas de Libération de París o de las colonias del regional-expansionisme parisenc coma Occitània).

E aqueste maitin soi estat forçat de crompar aqueste jornal del MIDI… La lenga d’Òc, la daissi pels professors de las universitats francesas en Occitània, o per l’administracion que vòl assegurar lo fosc lingüistic entre una unitat d’Estat e la diferéncia clara e lingüistica entre l’occitan e lo francés. Quí explica que parla la «langue d’Oïl» quora parla la lenga del segond article de la ConstituTion dels franchimands ? Quí ?

Atencion, aquí cal pas accuzar lo jornalista d’emplegar pas los bons mots, la bona semantica, cal dire clarament que los promotors de l’occitan sábon pas sovent se tirar del romantisme lingüistic, perqué vòlon pas èstre politic alara que lo problèma es politic ; Hadjadj es etimologicament un argumentari o lo que camin per La Meca, La Meca es lo París dels musulman, o París es lo La Meca dels Jacobins ; aquel lor faguèt una explica clara e l’administracion (son tribunal pròpri) es anada esclarent sul subjecte. L’administracion francesa e sos tribunals son aquí pel netejament lingüistic, contra l’occitan, contra la dignitat d’un pòble, e pel romantisme de la lenga d’Òc (aquí a l’escòla publica francesa e dins las universitats).

Occitània, tres resultas de l’enquèsta lingüistica d’Aquitània

L’enquèsta es pas distribuada a la premsa, mas a las associacions d’Aquitània. Mai de 6000 ciutadans son estats enquestats per telefòne en Aquitània, sovent en lenga occitana (coma previste pel modèl d’enquèsta e del tipe d’estadisticas conegudas pels professionals de las enquèstas).

Perqué l’enquèsta es pas difusida mai grandament ? Perqué amerita pas publicacions dins Sud-Ouest, suls sites d’informacions localas o dins los setmanaris ?

Es una causa que m’espanta grandament.

Per Vilanèva d’Òlt se vei clarament lo trabalh mediatic de Ràdio 4 e la causida mediatica de l’occitan esparpilhat dins lo programa francés.

Lo dorsier sancièr es de demandar a las associacions agenesas, sovent politicament engatjadas, associacions qu’acában d’aver lo dorsier departamental.

Vesèm dins l’enquèsta lingüistica la resulta de dos sègles de destruccion sistematica de l’occitan.

Malgrat una demanda fòrta d’ensenhament, segon l’enquèsta, lo restabliment de la dignitat lingüistica passarà pas sonque per son ensenhament, pertot dins lo sistèma educatiu.

Per assegurar una preséncia publica de la lenga e la definitiva baissa de l'emplec lingüistic sabèm mostrar l’exemple irlandés, pel gaelic d’Irlanda. Aurà calgut l’arribada de la television tot dins la lenga del país, oficiala çaquelà e lenga europèa tanben, aprèp un ensenhament obligatòri dempuèi 1921 ; en 1995 la television arriba e alara avèm la fin de la tombada dels locutors e de las locutriças, e un emplec ambe una visibilitat que tòrnan, dins un país que totes/as èran escolhats dins la lenga, seriosament coma se dèu per una lenga oficiala.

-°-

Preveire dins la vòstra agènda :

La realitat politica de l'esquèrra francesa en Occitània,

SIGEAN ! (SIJAN en occitan)