L’Estat francés e la seuna administracion son los mai enganiaires del monde, e pas per ideologia que díson, mas per interès d’Estat, l’Estat es sant e cal enganar « lo pòble» (lo mot latin public = çò qu'es del pòble, coma laïcos = çò qu'es a man del pòble mas en grec ancian), coma i a un « pòble » catolic dins las glèisas cada dimenge ; es de retorica, mas totes sabèm qu’es faus o aluzerpit, o podèm descodar.
L’indici incidiós que pròva que l’administracion francesa es cargada d’enganar las populacions, los pòbles sotmetuts, es la tecnologia nucleara, que fosquèsse civila o militara.
Aital, aqueste mes de setembre, l’administracion de la tecnologia nucleara comunica dins Sciences&Vie :
Dins «comment la France s’y prépare», i a un fum de comentaris que se podràn far :
1 / ambe “comment” se cal pausar la question de coma determinar un biais de foncionar ambe un objecte scientific desconegut, lo nucli d’una cellula es una causa pas encara coneguda en entièr, la divisar multiplica las descripcions e determina l’infinit de la coneisséncia. Es un pauc coma jogar ambe lo fuòc mantunes millenaris ambe la mestresa del fuòc, e pel moment es pas encara mestrejat l’estiu dins mantunas tombadas secas. E nos vòlon far creire qu’an mestrejar lo fuòc, e qu’o farà ambe lo nuclear, mas se fan pas cap accident, o podràn pas saber ! Es aiçò ? Mas coma es un accident ; o sabiàn pas abans Tchornòbil, e la fauta es estada donada a l’Estat sovietic ; o sabiàn pas ambe Fukushima, e la fauta es estada donada a l’entrepresa privatizada ; o sauràn pas quora petarà en França, destrusirà una bona partida del territòri, e serà benlèu la fauta del mercat-Estat-nacion, de l’administracion scientifica, o de l’entrepresa privada que ne fa la gestion ; mas la consequéncia la pagarà LO pòble d’inocents republicans dits franceses. Coma ? En milièrs de mòrt e en milièrs de vida desformada o còrs destrusits (es pas una metafòra).
2 / ambe “en France” s’establís un monolit, un personatge que se dèu d’èstre perqué es nommat aital per la propaganda nacionalista francesa. Imaginèm que fosquèsse realitat, l’administracion devendriá aital un robòt per aplicar las directivas ; lo «en France» seriá un Rubí Cub. Mas quitament dins una cellula, lo nuclear fabrica destruccions, alara perqué pas pensar que dins lo «en France» modèl Rubí Cub fosquèsse pas parier ? Effectivament quora Tchornòbil es arribat, Alsàcia, Francha-Comtea, Savòia, País Gavòt e de Nissa, e Corsega son estats tocats, mas l’administracion a trabalhat, mediatizat dins un sistèma de redaccions inocentassas que la frontièra arrestava lo fenomèn constatat en Bade-Würtemberg, Confederacion Helvetica, Alps italianas. Lo «en France» es la zòna mediatica de manipulacion de l’administracion francesa, ambe l’ajuda d’un sistèma de parladissa (TV, Ràdio, Jornals) que d’intelligéncia an sonque aquela del robòt per tractar aquela informacion.
3 / «s’y prépare», quora l’administracion o l’armada francesa explica que se prepara a quicòm, en general nos apercebèm qu’èra pas lo cas aprèp la catastròfa, o aprèp la guèrra. La linha Maginòt èra la mena de preparacion qu’an 1939 deviá, segur arrestar los «bòchs». Quora l’administracion de «en France» se prepara a quicòm, assaja la tecnica, manipula l’opinion «del pòble» religiosament beà, e sovent o farà, pro elonhat del centre de poder, perqué las causas se vesèssen mens per la màger part de la populacion d’inocentasses «franceses» ; aital los assages dedins lo Saharà en Argèria dita francesa d’abans 1962, o aqueles dels atòls pacifics ; dins los dos cases, «ils s’y sont préparé» e dins los dos cases i aguèt una catastròfa pel grope uman tocat. e pel primièr, damorar en Argèria dintrava dins l’argument per poder assajar dins lo saharà a desfaut d’autras luòcs estudiats, assajar e dons fabricar una guèrra per damorar en Argèria ; lo ministre de l’interior de l’epòca (sempre un membre de la casta republicana), François Mitterrand, o deviá plan mesurar.
Per aquestas tres rasons, lo títol de Sciences&Vie es de la propaganda nacionalista francesa sul tèma del nuclear. Es un biais incidiós, non formulat, d’explicar a l’inocentàs «pòble» de cresents republicans franceses, que lo nuclear es utile etot aquò plan mestrejar, es de propaganda nacionalista francesa.
A-n aquel fenomèn, i a un autre, lo nuclear es mai que tot per fabricar de l’enèrgia, e l’opacitat dels actors privats del nuclear es encara melhor que l’opacitat de l’armada francesa pel nuclear defensiu (e grandament inutil dins las guèrras modèrnas, veire Ucraïna invasida per las tropas russas actualament).
Dins l'article de Sciences&Vie i a çaquelà un document plan botar en valor que questiona, es aquel :
Quora peta una centrala sovietica, son «las frontièras del mercat-Estat-nacion França qu'arrestan lo nívol nuclear» paraula santa de l'administracion tecnofila e republicana francesa; la consequéncia d'aquela estupiditat, santa, republicana e francesa, es qu'ara, las centralas nuclearas francesas meton en dangièr populacions que son pas manipuladas per l'administracion jacobina e tecnologica francesa ; Corsega avèm poscut manipular aisidament, mas per Belgica ? Luxemborg, Alemanha, Confederacion Helvetica ? E donc aquí, «cal far atencion» (lo messatge es pas subdiminal), mai que las autras centralas ? E las centralas en Occitània serián mens dangierosas car governadas per la santa administracion tecnologica e republicana francesa, e lo poder jacobin, e las populacions mai aisidament manipulablas ? Es vertat que son sotmetudas aisidament al nacional-republicanisme francés, vertat ; e soi segur que l'administracion tecnologica e republicna francesa se dèu pensar, grandament soscar, que per las manipular sul tèma nuclear militar o civil, serà mai aisit... que per las populacions dels Estats independents vesins, e los govèrns en plaça ; es benlèu que son educats diferentament (?) ; es qu'Occitània auriá pas interès de demandar l'independéncia en partent d'aquel biais de foncionar del sistèma politic e tecnologic francés ?
Per clavar, «accident nucléaire» es una expression tautologica. Lo nuclear fabrica los accidents, es per natura (fins ara, tot èra amagat), perqué avèm jogat ambe lo fuòc, sense saber realament çò qu'èra aquel fuòc ; la natura umana alara fabrica «accidents nuclears», o incidents climatics, sempre grèus, per ignorança primària, e lo pauc de pensada filosofica en sciéncias o recèrcas.
Lo mai pietadós : aquel modèl tecnologic costós, centralizat, frena los desvolopaments dels autres mòdes de fabricacion d'enèrgias renoveladoiras, e dona un futur fosc per tota la civilizacion umana de la Tèrra. Donc, quitament sense «accident nucléaire», lo modèl tecnologic del nuclear es una endrona per l'umanitat, coma lo jacobinisme per la democracia. Mas lo nuclear es pas un accident, dins una societat tecnologica, que la produccion d'enèrgia es essenciala, lo nuclear per una administracion centralista, desligada de la democracia, es una manièra de fabricar un poder centrat, poder unic e aisidament manipulable, e d'evitar la troçejament del poder, es una manièra de gardar un poder per una casta «ben educada» que podèm dire tecnologica, aprèp èstre estada de sang blava (una gròssa engana umana), de sang republicana (modèl La Terreur) tip bonapartista (la tecnologia es pas la terror s'es pensada per la bona sentat de l'umanitat), avèm ara la casta tecnologica que lo nuclear li es essencial, per damorar al poder. Sèm en França, sèm pas en democracia, lo nuclear ne fabrica la pròva, es pas un accident.
Complement :
Cap comentari:
Publica un comentari a l'entrada