arcuèlh

dijous, d’agost 28, 2014

Ucraïna, Russia e dignitat internacionala

Ara, podèm confirmar l’invasion de l’Ucraïna, aquel d’anuèit, per las tropas armadas vengudas de la Federacion de Rússia. E me faràn pas creire que lo poder central moscovit, coma en agost 1944, sábon pas çò que se debana ambe las tropas armadas d’invasion sus la còsta d’Ucraïna, coma èra estat lo cas per la Crimèa, e lo referèndum de Crimèa tipe Napoleon-III per l’invasion de Savòia e la Comtea de Nissa.

Bandièra d'Ucraïna societas delinquere non potest

Vaquí un document tirat de Facebook. Ont i a un fum de referéncias a Stalin, per l’extrèma-esquèrra, e Hitler dins las populacions d’extrèma-esquèrra espanhòla, catalana e basco, sovent qu’an pas viscut la guèrra de 1939/45, o quitament vist, son filhs de resistents republicans, mas an oblidat l’istòria del XXen sègle. Aital fan referéncia a Vladimir Ilich….

Jordi Escudé "Totes les llibertats, son un engany si son contràries als interessos de l'alliberament del jou del capital (Vladimir Ilich Ulianov)" (referéncia donada aquò farà 8 oras quora ai escrit aquel bilhet)

German Rodriguez Fernandez : Lenin (en una mena de clarificacion)

Aquelas referéncias me fan cagar quora sabi qu'an matat centenars de miliers de populacions europèas (la CUP a Barcelona e mantunes sindicalistas en Occitània, o semblan oblidar), particularament de l'Euròpa de l'Èst. Aital en agost 1944, mai o mens 150.000 poloneses, patriòtas, son estats matats per las tropas nazi a Varsòvia ; èra plan una guèrra dedins la guèrra contra la dignitat democratica e la pluralitat politica. Lo govèrn polonés de Londres, exili forçat, e la seuna armada interiora, resistenta e qu'esperava fins ara, an assajat d'ajudar las tropas sovieticas a combatre l'enemic (qu'èra supausat èstre l'hitlerisme armat); los Angleses e los nòrds-Americans an demandat una ajuda als Soviets per poder lançar ajuda dins la ciutat de Varsòvia, e donc caliá daissar passar los avions de l'aligança contra Hitler. responsa del soviet en cap : « vos ajudarèm pas (es de dire, farèm coma se èretz enemics), car son dangieroses criminals» (los de Varsòvia) ; rapèl : èran las tropas de diferentas colors politicas, non sovieticas, de la Polònia democratica. Donc Stalin o Lenin coma referéncia, es coma se l'extrèma-dreita preniá Hitler coma referéncia dins l'Euròpa actuala. Gaitatz aquel programa pendent una setmana : picatz aquí (o podrètz gaitar, programa d’una ora, e de la cadena franco-alemanda ARTE-TV, gaitatz abans lo 1er setembre 2014).

L'extrèma-esquèrra francesa a causit son camp, Putin ! Remembrèm-nos de l'istòria. Cal escotar Jean-Luc Mélenchon, mantunes sindicalistas, CGT, FO, CFDT… associat per un còp de mai a l’extrèma-dreita francesa de Vendèa o del FN qu’an visitat la bona companhiá putiniana coma jamai dins l’istòria recenta.

L’extrèma-esquèrra catalana, CUP, intoxica lo debat politic dins Lo Jornalet, en Aran ambe l’ANC. E coma es de costuma fabrica l’extremisme per marcar la paur, e manipular los militants per los ajudar a agir «pour la cause» de l’anticapitalisme.

Invasion en Ucraïna

E dementre tot aiçò, un article de Le Monde, reprès per La Voix du Midi, qu’explica qu’un militant d’extrèma-dreita francesa qu’assajava dempuèi annadas –4 a 5 ans, es un importacion recenta-, a Tolosa, de crear violéncias per delegitimar l’occitanisme d’anuèch, favorizar lo nacionalisme francés, aqueles dels Identitaires, es estat fotografiat e donc vist del costat d’aquelas tropas de mercenaris d’extrèma-dreita favorables a l’intervecion especiala russa, especiala car privada (ça sembla, mas ambe tancs !) contra la democracia en Ucraïna, contra l’Union Europèa. Del meteis biais, o faguèron en Georgia, Naut-Karabac, Armenia, Crimèa (en vrac e sense seguir la realitat de las datas istoricas), etc. E los Estats Baltes, liures, son dins aquelas paurs del vesin violents de l’Èst, la Polònia se remembre sonque de la seuna istòria e oblida pas Lenin e Stalin. L’Istòria de l’Euròpa a l’Èst nos es estada sistematicament fòrabandida pel sistèma francés que pensa sonque  a las colonias o ex-colonias d’oltra-mar.

(L’article de La Voix du Midi,  l’ai a posita a tota demanda particulara, es estat publicat sonque 3 oras pel setmanièr tolzan ; podèm dire que Le Monde vòl gardar las exclusivitats informativas aquelas ? O avèm a far a una censura juridica de la premsa demandada per la persona concernida ?)

L’avuglament de l’occitanisme se resumirà en tres frasas de literatura («cal pas far de politica» Sèrgi Javaloyes m’o diguèt a L’Estivada, e apondrai, lo mèstre incidiós e francés o vòl pas), tres frasas legidas dins lo Gai Saber, revista occitana vièlha e de referéncia o contrapunt a còp, recentament sortit : «L’ostal ont èra lotjada la bibliotèca podiá pas mai far. L’Universitat tolosenca sabiá pas que ne far tanpauc e la Ciutat mondina aguèt pas pro d’èime per causir una solucion a l’aparament d’una Bibliotèca nacionala», i a aquí res que lo darrièr qualificatiu que far plaser, la rèsta es amagar la realitat istorica, es de literatura, son frasas dels fabricants de l’austruci plan elitari. E aiçò es signat d’un òme de la sciéncia sociala occitana, una vergonha. E coma ai seguit l’afar, pòdi explicar a-n aquel qu’o vòl, frasa a frasa l’engana literara qu’es aquel tèxte, especialament aquelas frasas.

Las presas de pausicions politicas de l’extremisme es sistematicament sul meteis plan, que fosquèsse d’esquèrra o de dreita. Son pausicions que negan l’istòria de las barbariás del XIXen e XXen sègle. Occitània es pas fòra d’aquel continent de faus-semblant politic, qu’ajuda l’extremisme de pujar a l’extrèma-esquèrra e l’extrèma-dreita.

La dignitat internacionala voldriá que tota la diplomacia russa fosquèsse mandada al delai de las val del flume Don, per assegurar un èime democratic a l’Union Europèa ; es la causa exteriora que questiona tanben sus la causa interiora a l’Union Europèa, en esperar qu’aurèm las aisinas politicas per relevar lo defís de sortir las clicas financièras que desfan l’Union Europèa, o que coma l’espèra Londres fabrica una Union Europèa coma un mercat e non pas coma una aisina de patz entre los pòbles, una aisina democratica.

Mapa d'Ucraïna Don

Aquel bilhet es un biais de cridar que lo modèl occitanista letradorenc es d’abandonar, cal passar a l’accion democratica contra los extremismes d’esquèrra o de dreita dedins l’Union Europèa.

camèl e estratègia occitanista