Malgrat la preséncia d’una television per Internet, la demanda d’una television, una vertadièra television (mejan e programa tota la jornada), es encara viventa en Bretanha.
Kevre Breizh es una coordinacion de las associacions de promocion del breton, associacion qu’an totas un engatjament public e politic clar, e que s’amagan pas per non far la promocion d’un partit o d’un autre partit breton o francés. Es una associacion independenta de tota organizacion politica.
Jà la demanda aviá ameritat una peticion ; la pròva que las peticions per Internet son pas gaire eficaças, levat per mobilizar un fiquièr qu’ajuda a bastir una associacion de ciutadans per far pression, e quora son pas per desvolopar un fialat de militants (que devendràn politics) a l’amagat.
Es vertat que cal debutar, mas dempuèi quant de tempses la television en lenga bretona per Internet a debutat, e qu’a pas realament encontrat un public, vist la dificultat tecnica de recepcion, e l’inadaptabilitat espontanèa del public per la recebre.
Una television se dèu batre –que fosquèsse en lenga francesa, occitana, o bretona- sul terrenh de la difusion dels autres mejans de televisions oficialas (95% son parisencas en França, 5% restentas son d’Estrasborg e de Lyon), es de dire, sobre la TNT (TDT). Ara, es aital, perqué totas las televisions normalas son sus aquel mejan numeric. E amai d’aiçò, aquesta television non dèu èstre lo relai d’un partit politic, mas clarament un instrument industrial per Bretanha, o per Occitània quora l’aurèm la television que m’agrada de poder donar coma bona resulta d’una militança occitanista, un ensemble natre de ciutadans d’Occitània.
Recentament es aparegut sul net, una television en lenga occitana, quatre oras de programa en serada ; sovent reciclatges que France 3 refusa sempre de difusar en granda dimension, e pas simplament en pichonet fenestron, e aiçò malgrat la Carta de television publica qu’es supausat seguir, mas que cap politician nacionalista francés farà aplicar sul tèma lingüistic.
Avèm un programa que serà segur publicat dins los mèdias de l’elita concernida ; lo modèl de finançament, la tecnica de difusion e mantunes contenguts, la fan pas de la qualitat que cal per èstre l’instrument politic qu’es supausat èstre dins aquel document-quí :
Ai vist passar mantunas vagadas la promocion sul net d’aquesta «television en lenga occitana», en lenga occitana, catalana o francesa ; es una pichoneta debuta bearnesa, vist la dimension, me sembla sense que la meteissa causa que la vièlha OC-TV, es de dire una difusion per una elita d’occitanistas, e los arquius que son a passejar se sap gaire pas ont. Espèri me poder enganar. L’espèr fa viure.
La bastison d’una television, malgrat la montanha de subvencions e la proimocion per los que recebon subvencions dels meteisses organismes publics, non se podrà improvizar per agradar al programa electoral. Las subvencions fan pas una television, una television es dedins una politica lingüistica, clarament volguda, e installada sobre mantunas detzenas d’annadas. Avèm pel moment un ambrion, e l’Estat que dèu regular aquesta politica, malgrat las polidas paraulas politicas bailadas per la pression populara dels «bonnets rouges», non se podrà pas faire sense una reala volontat del capolièr republican de l’Elisèu ; es aital lo sistèma francés, es bonapartista, del cap a bais.
Anatz veire lo site o blòg de l’associacion Kevre Breizh, son engatjats politicament, en ciutadanetat, mas son natres per l’etiqueta politica, e faràn pas la dintrada dins l’enjòc politic, ni per las municipalas, ni per las regionalas, ni per las europèas ; en Bretanha i a mantunas colors politicas qu’o fan jà, ambe mai de seriós que çò que vesi en Occitània. Vertat qu’es mens grand, Bretanha, ambe Naoned compresa.
Se cal recordar de quina manièra TV3 es estada bastida ? Se cal recordar que los dreits de difusion de Dallas en lenga catalana per Espanha, li an bailat una estatura de dimension internacionala ? TV3 èra la clau d’una debuta de politica lingüistica, ambe una volontat politica clara.
Se cal recordar la debuta d’EITB ?
-°-
Cap comentari:
Publica un comentari a l'entrada