arcuèlh

divendres, de gener 06, 2017

2017, pèira nègra per l'occitan e l'administracion francesa

Sèm en genièr, de Mentan a Lacanau, de Garat a Quilhan, de Baiona a Briançoneta, per l'administracion francesa dels collègis, es lo moment de parlar ambe los professors per donar l'avenir dels corses en sobre (occitan, latin, grec, portugués, rus, etc.), corses en sobre per rappòrt a l'aplicacion de la novèla reforma socialista ; se farga segon los endreits en ambient de jòia nacionalista francesa (per l'occitan abandonat) o en tristessa de perdre professors de granda qualitat, mas que "coma aguent d'estatut de foncionari" serà salvat per la bivalença del recrutament, e serà professors d'istòria : "es parier, non ?" Faràn matematicas, istòria o devendràn director de collègi (raríssim). fauta corses de geografia vist çò que los mèdias franceses nos dónan cada ser al jornal televisat coma errors geograficas.  La preparacion administrativa se faguèt a docina, sobretot pels professors qu'an pas lo capes, an agut de dormir dins iortas, defòra per poder ensenhar (4 oras aquí, 3 oras ailà, 2 per aquí, ambe 2€ del km per cobrir los còsts de desplaçament e organizar los oraris merdics), per poder ensenhar l'occitan dins aquel bordèl organizat : l'Éducation dita Nationale.
La "regionalizacion" del mamot o aviá pas capitat ; pauc a pauc, devath la pression productivista (s'organiza aquò tanben), pression de l'ignorança de la populacion, l'administracion se prepara la maissanta dintrada 2017, ambe la reforma socialista de l'Éducation dita Nationale.

Pauc a pauc e per gentas rasons grandament administrativas, l'ensenhament de l'occitan desapareisserà del collègi de l'Estat francés. Çò que la dreita a pas capitat de far, seràn los socialistas que l'auràn fait ambe la reforma darrièra. Collègi aprèp collègi l'occitan s'en va. L'administracion francesa (ajudat pel govèrn socialista) l'aurà crebat. E los professors d'occitan per estatut de foncionaris d'Estat, la resèrva de parlar, se fan interdire de dire aquò a la premsa ; l'administracion susvelha la paraula dels professors valents per simplament dire la realitat maissanta que fau pas dire ni escriure. Es l'estalinisme administratiu jacobin francés (lo collègi son devenguts camp anti-professor-d'occitan que la paraula es pas liura), sobretot sul tèma de la lenga mesprezada occitana.

Per l'occitan, dins lo continent europèu, damorarà sens que la Val d'Aran e Mónego (corses obligatòris) per l'ensenhament al collègi. Perqué ? ES OBLIGATÒRI !

Amai d'aver corses mal adaptats a la situacion politica de l'Estat francés, l'universitat francesa en Occitània aurà lèu pus mestièr de formar professors d'occitan ; la situacion es a man de tornar a l'an pre-istoric de 1954, que los corses se fasián a gratís segon la bona volontat dels professors (e n'i aviá bravament mai qu'ara), gràcia a la politica socialista sul tèma, 2017 serà de marcar d'una pèira ròsa-nègra sus la promessa oblidada pels tres govèrns de François Hollande e l'ensenhament de l'occitan descapitat.

Fau notar çaquelà qu'aquel ensenhament a pas donat granda assegurança per la lenga occitana ; sobreviu malgrat tot, fòra, e ambe una populacion desalfabetizada en occitan.