arcuèlh

divendres, de gener 13, 2017

Los illustres de Tolosa an panèus

Pendent la commemoracion dels Dreits Comunals tolzans, que son estats redigits en occitan ; avèm poscut verificar que l'idèa de l'occitan coma lenga de comunicacion èra pas la nòrma pensada dins totes los servicis de la comuna de Tolosa, aital un servici segurament istoric a plaçat panèus informatius en tres lengas, l'occitan es oblidat e las tres lengas causidas son las imperialistas europèas, espanhòl, anglés e francés ; an ges pensat que lo rus, l'alemand o lo chinés mandarin auriá poscut avantatjosament acompanhar la lenga de Tolosa, dels illustres de Tolosa, l'occitan, lenga pont de la latinitat e donc de l'espaci lingüistic mai grand del monde e non imperialista (l'occitan o es jamai estat grandament, benlèu un pauc del costat de Nafarroa, çaquelà - e o fau pas oblidar).


Cada còp que l'administracion de la comuna farga quicòm d'utile e que l'occitan s'i podriá botar a gratís, l'administracion comunala se carga d'oblidar l'occitan, e alara l'occitan capita d'èstre una factura per totes, los que paga la fiscalitat de Tolosa...

Donc encara un còp, l'occitan es pas sola lenga a non pas èstre oblidada a Tolosa ; fau notar per l'administracion tolzana que l'alemand es la lenga la mai parlada a AIRBUS, e que lo rus es la lenga la mai parlada sul continent europèu, de mai l'occitan es la lenga de Godolin, lenga istorica de la vila e lenga pont de la latinitat.

Me sembla que Jean-Luc Mouden en luòc que provar que lo cumul dels mandat es utile a París, fariá melhor de visitar lo trabalh de la seuna administracion tolzana !