L’intervencion sus LCI –LCI, grope TF1 aficat mantunes còps ambe lo «regionalisme» breton- de Christian Troadec pròva qu’i a una pensada de reforma territoriala elonhada dels pòbles concernits (e parli pas simplament dels Bascos, o Catalans, totes sense excepcion), e amai es la pròva qu’es una reforma socialista, pels «barons socialistas» coma l’indica Chritian Troadec.
A Montpelhièr, se sap que lo socialisme actual es en dangièr, la pròva es faita pels comptes en roge del PSf de l’Erault, seccion departamentala considerada coma fòrta fins ara ; la dicidéncia l’a matada, perqué lo Parti Socialiste francés es fait d’administrators o administratriças de la decentralizacion, dins los departaments, mai tanben dins las vilas. Puèi a Tolosa, que Martin Malvy serà pus candidat per las eleccions venentas, se podrà legitimar una candidatura presentada pels Parisencs (en francés, parachutage), e per una «novèla» region administrativa francesa qu’es pron granda (grand es supausat eficaç, es la teoria del colonialisme francés), mas que los poders seràn pron pichonets per rapòrt a l’independéncia que s’anoncia de l’autre costat pirinenc.
E coma aquesta region Lengadòc-Catalonha serà pron granda, se pensa jà fabricar autonomias departamentalas ? 1 / Me recòrdi un Martin Malvy explicar jà que Miègdia-Pirinèus es la superficia de Benelux ! 2 / aquesta reforma serà benlèu la salvacion per Perpinyà que obtendrà de Tolosa çò qu’a jamai agut de Montpelhièr, levat li panar las fièras comercialas de nivèl mondial. 3 / se veirà benlèu melhor que Nimes es provençala, e non pas montpelherenca… 4 / Los del Roergue, Milhau, aniràn melhor a Montpelhièr qu’abans ? Soi segur que l’antena regionalista administrativa francesa de Montpelhièr dins la novèla region socialista fabricarà foncionaris que son supausats èstre demesits per aquesta reforma. 5 / una politica per l’occitan qu’es mai clara a Montpelhièr qu’a Tolosa, serà aplicada a Tolosa ara ?
Tre 1969, la creacion de las regions administrativas francesas èra jà un problèma ; perqué jamai las populacions son estadas consultadas. Los pòbles sotmetuts an sempre agut de suportar la talha, la gabèla, etc. per pagar las facturas de l’Estat reial o republican, se sonava las Generalitats. La Generalitat de Lengadòc tòrna ambe la reforma socialista francesa. Seràn socialista qu’an votat los plens poders a Philippe Pétain en 1939 al Parlament de Bordèu ; es benlèu la rason que Bordèu damora ambe sa region, benlèu … o Benlèu que Alain Rousset a plan sabut jogar.
Anèm prendre un exemple paradoxal e que dèu pas èstre plan vesedor a París, malgrat las campanhas publicitàrias ligadas a la marca aquela :
Se l’Aquitània e Miègdia-pirinèus èran aital ligat ambe aquesta marca. Entendi pas que posquèsse pas èstre ara ambe Lengadòc-Rosselhon ; son los socialistas del terrenh qu’an establit la marca e que ara se trapa que la marca cobrirà la circonscripcion electorala europenca… Donc lo “Sud-Ouest”, regionalisme francés e parisenc, se trasnformarà en “Sud-Sud-Ouest” ?
Non francament, cal daissar a las populacions concernidas la reforma en man, e que París abandonèsse los seus dictats territorials. Per préner l’exemple alemand, Bremen es tot pichonet per rapòrt a Bavièra, e pel moment i a pas de reform en vista a Berlin !
Per contra, lo pròblèma l’explica plan Martin Malvy e Alain Rousset quora explícan que cal poders superiors en regions (Europe1, RTL, Radio fRANCE, RMC, etc.), apondrai que cal sobretot, mens de poders superiors a París, mens mas bravament mens.
La sola reforma territoriala que donariá significacion es aquela, ambe benlèu un grand París coma los Parisencs lor agrada, mas aquí i soi pas per imposar dempuèi Tolosa çò que los es agradable.
Dins mantunas annadas, aurèm la reforma UMP ?
Las reformas dels Parisencs son sempre una granda estupiditat quora se tòca a «la province».
Cap comentari:
Publica un comentari a l'entrada