arcuèlh

dimecres, de març 09, 2011

Socialistas e manipuladors, es ontologic ? (dins la biaça i dintrèm tanben FdG e PRG)

La majoritat dels grands militants del partit socialista en França son professors, se podrà pas dire que representan tota la societat, perqué la minoritat son sovent foncionaris de la decentralizacion. La qualitat de la representacion socialista de l’ensemble de la populacion es puslèu pietadosa, çaquelà ne sábon jogar. La majoritat dels professor de l’ÉducaTion NaTionale son contra l’occitan, coma contra lo catalan, cap problèma pel netejament lingüistic per els.

En decembre passat, a calgut trabalhar per aver una serada de presentacion de la «lei de l’occitan, aranés en Aran», aurà calgut fòrça pressions e engatjaments politics per l’aver (engatjament personal, e tanben collectiu pel grope Europe Écologie).

E coma aquesta pression agrada pas los socialistas tolzans, an jogat del coorporatisme per enterrar mediaticament la serada de presentacion de la primièra lei democraticament votada, una lei per totes/as e modelica (benlèu tròp ?), al mièg d’un programa de promocion de l’ensenhament de las lengas romanas (que la qualitat es pas de negar,  qu’amerita tanben una presentacion, zo cal pas negar). La manipulacion èra tròp fòrta, e se vegèt tròp, malgrat totes los somriures de circonstàncias, la diplomacia de la decentralizacion es tanben autanplan contra productiva que la diplomacia de la «portuguesa» del govèrn Sarkozy dins los Estats arabes.

Èra talament fòrta, e los socialistas son talament un public que pratica l’ostracisme politic, sobretot en majoritat excessiva, que digun del mitan occitanista gausa parlar o escriure. La democracia es pas lo fòrt dels socialistas (e companhiá), òc en faciada, non per darrièr e a l’amagat.

Es estat un escandal que lo president de la region, alara que la serada èra especialament faita per aiçò, es partit al mièg de la serada en companhia del naut foncionari de l’Estat per l’educacion ; èra l’expression d’un mesprètz total, total pel Parlament de Catalonha (l’ancian) qu’a votat una lei per l’occitan, lenga qu’es malastrosament desvolorizada per aqueste personal politic socialista. Çò d’incomprenedor es l’actitud de collaboracionista de foncionaris de l’ÉducaTion dicha NaTionale per presentar un metòde per ajudar los socialistas per enterrar la serada ; al mens que se posquèsse comprendre per lor engatjament pro-socialista los uèlhs clucs, o per assegurar las resorgas de subvencions, un chantage classic e antidemocratic.

Uèi lo Parlament catalan a cambiat de color e soi segur qu’aurián refusat d’organizar la serada, de l’esquèrra lo Parlament es passat a CiU… la «dreita» tant criticada quora sembla al MoDem, quitament en Catalonha.

Aital podèm considerar qu’es de terrorisme intellectual, politic e un element d’antidemocracia, quí es lo drac per aital «vivre al païs» en plena diglosia de l’ipocrisia ambe lo poder omnipresent dich d’esquèrra socialista (PSF-PRG-FdG). Aital dins la revista del Conselh Regional, prodigiosament publicada la setmana de la campanha electorala (cantonalas), se podrà veire sonque aquò.

manipulacions socialistas

Viure al país, dignament, se podrà pas far ambe clara volontat de practicar «le croche pied» a cada iniciativa qu’ es pas sonque de la politica de gestion de la decentralizacion, o de l’amistat partesana.

Lo drac del Lòc Ness passa de temps en temps quora se parla de l’occitan e dels socialistas, la coregrafia es sovent la meteissa. Es una dansa d’ipocritas.

Encara un còp, ai de mal de comprendre perqué los Ecologistas pòdon surportar aiçò a cada dorsier al Conselh Regional. Car es pas lo sol exemple ; i a segurament causas que s’amagan e que se preparan en consequéncias de las eleccions venentas… Ne veirèm segurament mantunes enlutzir l’actualitat dins los jorns que venon.

Dins la revista se podrà veire Gérard Onesta que presenta sa vision de las relacions de la region ambe l’Union Europèa, e dins l’ensemble de las paginas se podrà veire lo deputat Kader Arif, pron conegut per aver mestièr del pòste de deputat europèu puslèu per pagar l’escòla a sa filha al Estats-Units d’America del nòrd que per devolopar un projecte europèu digne ambe una region occitana, la region de Tolosa, e qu’es pas conselhièr regional, mas es lo piont que los socialistas an per far illusion al prèp del grand public sobre la question europèa, o sobre los fenestrons locals.

Los socialistas esqüátan los pòstes de poder de la decentralizacion, mas la qualitat de lor vision dels territòris que n’an la gestion, es puslèu sonque electoralista (veire lo PRG en Tarn-e-Garona per l’agricultura e lo darrièr numèro de la revista del CG, veire un bilhet mai ancian).

Quina son las vint leiçons per manipular l’informacion, o per far saber a totes /as los ciutadans de la region la dignitat d’una lei per l’occitan, votada demoraticament per un Parlament d’esquèrra ? Demandatz al grope de comunicacion dels militants professors socialistas del Conselh Regional de Miègdia-Pirinèus.

Ambe aqueste bilhet podrètz melhor entendre perqué los ecologistas demandan d’èstre associat a la politica de comunicacion del Conselh Regional de Miègdia-Pirinèus.

-°-

Discutida ambe una militanta de J.-C. Cambadelis… lo socialisme franquista de nauta-Garona, s’expausa dins la campanha electorala, lo 15 de març en linha. Es net e clar, es l’expression del nacional-expansionisme francés, la confusion etnista entre lo juridic (ciutadnetat) e l’antropologic (la nacionalitat),j es Ernest Renan en viu, es Maurici Barrès en viu, los dos grands amics de la dreita francesa (UMP-NC, MoDem). La militanta d’amaga… çaquelà.

cambadelis de fugirNuclear no grazie