Es lo coratge de l'ignorança, ignorança bastida sobre lo sistèma d'educacion francés que refusa de presentar l'istòria, la lenga e la geografia localas, la vida reala de cada jorn de tot ciutadan (en Bretanha o en Occitània), ajudat aital pels mèdias televisuals majoritariament parisencs, pels coorporatismes (de tot tipe), pels sindicats professionals d’educacion e pels sistèmas ierarquics parisencs del sistèma Éducation Nationale.
Sabi pas un element del sistèma francés (imposat per la fòrça en Occitània), qu’a pas agut un ròtle dins lo desvolopament de l’ignorança, exceptat mantunes militants engatjats dedins lo sostèma. Las consequéncias seràn de mai en mai claras, per exemple en Bretanha, podèm dire qu’es lo coratge de l’ignorança francesa, una excepcion culturala :
Lo sistèma educatiu francés es ges adaptat a las realitats localas, bretona o occitana, es volontari, es un acte politic nacionalista francés, un nacionalisme de conquèsta, expansionista ; cal aver un mercat que parla francés, cal aver soldats que se lor posquèssen donar òrdres dins la lenga del rei-president, cal poder crompar a las entrepresas installadas a París, cal aver un plega-esquina que l’administracion li posquèsse imposar tot escantilh de problèma politic e social. Lo sistèma republican es lo meteis que quora lo rei donava un territòri de fiscalitat a un amic, una familha dicha nòbla.
Un sindicat coma FO, per exemple dins las Lanas en junh 2011, refusa l’entrada de l’occitan dins lo sistèma, en considerar que cal persegre lo netejament etnic francés ; es aital que podèm considerar qu’FO es a la raiça del problèma que podèm descriure dins l’article de Ouest-France. Ai agut de suportar tanben una violéncia dins lo mètro de Tolosa per aver respondut en occitan, alara que la persona a quí parlavi, a comprès qu’èri pas estrangièr (donc forçadament francés e donc interdich de ma lenga costumièra, es un formatatge general), ai agut a recebre un còp de punt, leugièr (mas l’intencion i èra).
Lo nacionalista normal (mas segur qu’es coma Mèstre Jourdain un òme que fabrica de pròsa sense saber), demandarà que parlèssen aital sistematicament francés per evitar lo problèma, sense ne parlar i a pus cap problèma tanpauc ; quí m’a pas demandat una traduccion sul net per ajudar los Franceses de damorar dins l’ignorança... Alara de qu’es una lenga qu’es pas emplegada ? … es un article de la constituTion, un patrimòni, un element de musèu ; lo sistèma politic es aquí per nos convéncer del conservatisme que cal servar de faiçon republicana.
Lo poder centralista francés li agrada l’ignorança desvolopada pel sistèma nacionalista francés d’educacion, li agrada lo coorporatisme dels professors de lenga que refusa l’occitan coma lenga normala d’ensenhament, li agrada de non pas aver de panèu en occitan dins los licèus o las vilas, aital l’ignorança se podrà contunhar e l’ignorança ajudent a matar l’enveja d’aver locutors publics d’occitan, aital la politica d’ignorança mediatica francesa es una politica nacionalista d’exterminacion de la lenga occitana (o bretona), e del problèma relevat aital la comuna de Brest, pels locutors de breton, e alara per Ouest-France.
Aital avèm lo mesclum nacionalista del jornal Le Parisien, ajudat per l’AFP, veire lo bilhet següent.
Atencion : es que lo ciutadans violents e lo sistèma son pas a botar dins la mesma biaça ? L’extrèma-dreita castigarà la persona qu’a creat la violéncia contra l’autoctòne, lo locutor breton (dins aquel cas). Es de recuperacion politica. Se ne cal mesfisar.
La solucion es : una educacion que la gestion se farà en region, la solucion la dona Eva Joly dins las darrièras intervencions. Veire lo bilhet següent.
Cap comentari:
Publica un comentari a l'entrada