Dins la manifestacion de dissabte passat, los Bretons(istas) an portat a la prefectura la signaletica monolingüa a la prefectura.
La bandièra francesa explicita clarament que la protestacion èra per castigar las autoritats francesas en Bretanha.
Mas concretament quí installa la signaletica ?
1 / las comunas – pensi que an aquel nivèla lo panèu d’entrada de las comunas occitanas es luènh d’èstre sufisent. Soi segur que l’IGN es jà preste per saber ajudar los elegits a trabalhar coma cal sobre d’espaci comunal ; de qué ? los elegits del Partit Occitan li an pas encara pensat ? Malgrat tot, l’institut universitari de geografia de Perpinyà a jà fait un trabalh dempuèi mantunas annadas sul tèma. Un collòqui sense cap resson mediatic es estat prepausat al Conselh Regional de Tolosa sul tèma ; quí n’a los arquius ?
2 / las aglomeracions – alara la primièra signatura de l’aglomeracion de Tolosa prepausa una novèla via, e benlèu enfin una visibilitat de l’occitan sobre la signaletica que cal, es de dire tota la signaletica, podèm esperar… causa concreta e veire l’occitan present a Tolosa, pertot, e malgrat los elegits patoisejaires de l’UMP.
3 / los departaments – a cada cambiament de vièlhs panèus, còsta res de mai de pensar a l’occitan, de l’ortografiar e d’o plaçar a costat del francés ; e aiçò es possible dempuèi mai de vint annadas, e zo esperèm en Nauta-Garona (e tantes autres departamnt que fan la gestion de la signaletica), coma dins los autres departaments bretons (perqué causa possibla en Bretanha o seriá pas en Occitània ?) ; aquela signaletica bretona que desagrada fòrça a Marine Le Pen.
4 / las regions – a cada iniciativa d’ajuda dels Conselhs Regionals, perqué l’occitan, parier que l’ecologia, seriá pas valorizada, per un còst mendre ? Parier lo còst de l’emplec de l’occitan es simplament marginal s’es pensat abans de practicar la comunicacion, la signaletica o tot escrich qu’es adreiçat al grand public.
Quantes panèus caldrà desraiçigar per aver aquesta signaletica occitana en Occitània ?
Perqué cal pas simplament demandar la signatura de la Carta, cal agir sul terrenh per la visibilitat de la lenga, dins la signaletica coma endacòm mai.
S’espèra l’occitan suls panèus de Nauta-Garona per l’occitan… es de competéncias –pauc cara- del Conselh General ! La signatura de la Carta, 56 prepausicions sobre 60, sufís pas.
1 comentari:
A part dòna Lafòrga, me sembla... Pas grand monde coma elegit deu Conselh-Generau de Garona-Nauta a la protesta de dissabte ! E quan avèvan sinhat la peticion ? En Garona-Nauta, la màger part deus elegits deu Conselh-Generau son contra o s'interessan pas a l'occitan... Alavetz, avan d'aver ua senhaletica en occitan d'eres... Qu'ei pas ganhat ! La solucion ? le còp venent (2014), cau aperar a votar un vertadèr candidat favorabla a la lenga nòsta, pas un candidat PS sonque per'mor que Hollande a promés de ratificar la carta : qu'ei pas ua garantia que lo PS locau i sia favorabla.
Publica un comentari a l'entrada