La pagina Internet d’informacion Vilaweb acaba d’entrevistar lo cantaire Ramoncín, espanhòl vengut en Catalonha per la campanha de l’ANC ; aquesta campanha ajuda a l’informacion suls camins de l’independéncia.
L’entrevista es en lenga espanhòla, sobtitolada en catalan per las questions. La responsa a la question de saber qué votariá, s’èra ciutadan de Catalonha : «votariá sí» a l’independéncia de Catalonha. La Catalonha que parla, es la Catalonha de l’Estat espanhòl, lo principat Sud.
Dins doás tribunas de France Culture, en matinada, se parlava del referèndum per saber se la «Granda-Bretanha» deviá damorar dins l’Union Europèa. Sistematicament los Parisencs (majoritariament dins lo sistèma mediatic francés) oblídan que lo Reialme-Unit es pas la Granda-Bretanha, que la geografia es pas lo politic ; lo midi es pas Occitània. Reialme-Unit = Manx, Irlanda del Nòrd, Escòcia, País de Gallas, Anglatèrra e las Isclas Anglo-Normandas (pensi qu’ai res oblidat…), per èstre clar e non mesclar lo politic e lo geografic, per la precision jornalistica que fauta sempre als jornalistas franceses sul tèma.
Donc per èstre democrata e republican, o etiquetat aital, las tribunas pensan que son sonque per manipular lo sistèma politic anglés ; e alara s’oblida sistematicament la situacion sancièra del Reialme-Unit. Lo referèndum per l’independéncia d’Escòcia es oblidat, perqué ? Previst en 2014, e n’an parlat ! Dèu èstre perqué es un «regionalisme» e donc que dèu pas tocar a l’universal, çò que pensan es universal perqué o pensan en francés (per èstre clar, aquò vòl pas dire precís politicament) … De la meteissa manièra s’oblida la situacion en Irlanda del nòrd, ont l’Union Europèa favoriza lo trabalh politic sobre una Iscla de las Isclas Britanicas ; e donc se podrà alara tractat dels movements recents a prepaus de las bandièras de mantunas vilas d’Uslter del Reialme-Unit.
Donc un referèndum que sortiriá Anglatèrra de l’Union Europèa auriá consequéncias en Escòcia e Irlanda del nòrd. Podèm pensar que la democracia que s’aplica en Catalonha aurà tanben consequéncias en Irlanda, Espanha, Itàlia, mai tanben en Occitània, e Catalonha del nòrd.
Quina son las consequéncias ? (pel R-U) Son forçadament ligadas a l’existéncia d’una Union Europèa diferenta. Veirèm donc lèu los anti-U.E. del continent europèu votar per l’U.E. en Anglatèrra, e los que son contra l’U.E. en Angletèrra ajudar Escòcia e Catalonha de devenir independents, per aver una cadièra en Euròpa, a Brussèla, e benlèu l’enlevar a Anglatèrra.
Dins aquestas situacions moventas, e luènh del concervatisme nacional-expansionista anglés, francés e espanhòl, avèm alara un dessenh clar d’una Euròpa de democratas, una Euròpa federala que se fabrica, mai o mens sense los partits en plaça a París, London, o Madrid.
Son terratremols politics europèus que faràn lèu l’Union Federala Europèa, perqué sèm democratas, coma aqueles ciutadans espanhòls qu’explícan las loras pausicions coma ciutadans madrilencs o castilhans. Per contrapunt, los autres (que cal sonat conservadors) son prigondament anti-democratas.
Cap comentari:
Publica un comentari a l'entrada