L’anti-americanisme prim fabrica encara

Dins lo contèxte de l’anti-americanisme primari e de l’antimilitarisme contra l’OTAN (estructura en plaça per contrar las incapacitats francesas de bastir una Union Europèa de la defensa, mas Euratom sí !), avèm sempre dins aquel camp L’Humanité, lo jornal devengut aquel dels comunistas ortodòxes a Moscòu, un pauc coma lo NPA ! E ara, prèp dels combats de tot escantilh, perqué tot fa vendre, en politica coma en minjar.

L’avertiment de L’Humanité es tanben partatjat per EELV-POC-Bastir (que fan aplec amassa a Tolosa unicament e per la circonscripcion dita del “Sud-Ouest”).

En general se trapa sovent EELV-POC-Bastir-PCf dins las manifestacions per l’occitan (abans las eleccionsdonc), e lo NPA tanben que se nausa d’aver escrit en occitan lo trac per la manifestacion de Tolosa ; l’occitan, la lenga sul trac, pels Occitans perqué comprenguèssen melhor que lo NPA es «amic dels Occitans». Al NPA son pas Occitans, son los nòstres amics…

E per Carcassona, la manifestacion ‘anem per l’occitan’, avèm pas poscut verificar lo provèrbi bearnés : Prestar de Carcassona, quí l’i prèsta, l’i dona. E avèm pas vist passar la politica lingüistica per la vila dels amics que manifestava ambe los del PSf en bona companhiá del POC-Bastir. ara, las colors «dels amics» de Carcassona a cambiat.

Se parla de tornar manifestar ambe «los amics» e «las amistats» aqueles ….

En matièra d’amics dels Occitans, e coma los amics dels amics son dins la longa lista del maridatge prepausat pel NPA, avèm un indici que nos ajudarà dins una fòto veïculada per una lista bretona del NPA que ela emplega lo breton a tot moment, e en campanha europèa tanben, mas simplament quand «los Occitans» son succeptibles d’o legir «en occitan», plan segur ; «los Occitans en occitan», es un tèma recurrent pel sistèma mediatic francés en Occitània, mas pel NPA tanben a Tolosa. Alara gaitèm l’indici, es grandament sotalinhat, per plan entendre :

Lo NPA, lo POC-Bastir, EELV son sistematicament dins las manifestacions ditas AntiFA … en Itàlia, los manifestants AntiFA son mens discrets sus la vision politica qu’aquelas manifestacions pòrtan …. de cap a la nostalgia sovietica ! De cap a l’Èst e a Putin qu’a plan integrat l’idèa de la granda Rússia dedins una «federacion emplenada de mantunas nacions» ; la frasa l’ai entenduda sus RTS que se donèt l’entrevista d’un suporter de Lenin, amusent del tot ; son pron aluzerpits los jornalistas de la RTS per donar dins l’original, la paraula a totes. Aquel suporter de Lenin li agradava Putin, mas li trapava «una politica un pauc leugièra» a prepaus de l’Ucraïna.

Donc lo NPA, POC-Bastir, EELV son dins aquel camp ? O gausi pas creire ! L’Humanité es pus classic… mas sembla que gausan pas donar un avejaire e EELV son dins lo camp de Maïdan, segon çò qu’ai puscut entendre. La paradòxa es que per l’occitan se tòrnan trapar dins lo meteis camp de la compassion lingüistica, coma totes los partits franceses en Occitània.

Lo NPA e L’Humanité son dins lo camp que tròban que lo referèndum de Crimèa èra normal e que l’annexion de Crimèa a la Federacion de Rússia èra normala ; lo referèndum de Donhètz es explicat pel PP de Madrid, lo pòst franquisme qu’a plaçat un militant de VOX a la vice-presidéncia del Parlament Europèu, explicat coma autanplan illegal qu’o serà lo referèndum de Catalonha ; lo PP, membre del PPE al Parlament d’Estasborg (donc de l’UMP), es del costat NPA e PCf sus aquel afar ; perqué ? Perqué sense saber lo NPA e lo PCf son dins lo camp de l’imperialisme e del mercat-Estat-nacion qu’escana los pichons (l’UMP tanben, vist qu’Alliot-Marie, cap de lista per las eleccions europèas 2014 dins la circonscripcion “Sud-Ouest”, es del camp Ben Ali de l’anciana «democracia» tunisiana) ; estranh lo POC-Bastir e EELV costejan, sus aquel dorsier, un sosten als Ucraïnians, o m’engani ?

Donc tornam a la primièra pagina de L’Humanité : perqué las negociacions son causas dangierosas ? Son dangierosas perqué una casta al poder las vòl manipular, segur ; aquel qu’aurà coma vision lo mercat que li ajudarà a far creisser las seunas Chifras d’Afar (avèm pas cambiat de regime ambe 1789). Mas aquò es simplament lo rebat de l’abséncia de democracia per los que son a la taula de las negociacions, donc actualament lo Partit Popular Europèu del Parlament Europèu ; lo mercat es a la taula (aquí soi dins lo camp del NPA !)  Mas perqué non negociar ? Avèm pas los bons interlocutors europèus ? Benlèu que sí ; alara s’es lo cas, es urgent d’anar votar lo 25 de mai, en evitar de votar pels amics dels amics qu’an Putin coma amics politics.

Las entrepresas europèas an quicòm de perdre ? Perqué an sempre perdut ? Benlèu perqué an pas pron de visions autonòmas del mercat que son capablas d’aver ? Avèm pas los bons interlocutors europèus ? Benlèu que sí ; alara s’es lo cas, es urgent d’anar votar lo 25 de mai, en evitar de votar pels amics dels amics qu’an lo mercat-Estat-nacion coma referent unic.

I a sempre quicòm de reténer dins la premsa que cal crompar e legir entre las linhas, coma La Pravda - Правда - d’un còp èra e d’ara o La setmana, o Lo Jornalet. Car la Правда es pas brica l’Истина, sobretot en jornalisme politic francés (referéncia Dictionnaire Européen de Philosophie).

-°-

Ucraïna contra pro-Russes que fan complicat las eleccions del 25 de mai de 2014