Montsegur 2014

Convidacion-Tribuna

Pas res per vendre, pas res per crompar. Pas que de temps "per pèrdre", d'esperit a desliurar. Dins l'anonimat siau d'una reflexion intima, Montsegur nos embelina. Siem aquí luènh de las comemoracions oficialas, nacionalistas tricolòras. Aicí, l'uman rare dialòga amb l'uman viu; lo qu'a pas perdut son esperança, lo que crida justícia e que, sens arma, acaba per esposar la libertat.

Exemple sens o voler, fòrça sens lo poder; plan luènh de las quimèras dels imatges pretenduts modèrnes, aièr es un present etèrne que, al delà la fatuitat del quotidian, nos ensenha lo camin.

Ongan encara, vos prepausem una ceremonia de reculhiment, dobèrta a totes per dire de rasonar al monde.

Rendètz-vos al Prat dels Cremats

lo dimenge 16 de març ‘14 a 11 oras

Jacme Pince, per "Occitània e Libertat"

--------------------------------------------------------------------------------------------------------------------------------------------

Una manièra occitana de recordar totes los chaples que los imperialismes an dins las mans devengudas sampitèrnas mans sangnosas, e que los Francs son estats los primièrs a portar en companhiá del Vatican ambe l’etiqueta d’un sistèma linde e blós, ara dit republican.