Encara un article nacionalista dins La Dépêche dita del ‘Midi’.

Per un article d’aqueste escantilh, s’èra estat un nacionalista d’extrèma dreita franchimanda, l’article seriá estat publicat dins la pagina Grand Sud, veire pagina politica. Anuèch es en pagina Foish que l’article es publicat.

Mas aquí tot l’article damora dins la compassion nacionalista francesa, sense cercar d’explicacions del costat de l’acte, o puslèu de l’actor ; perqué cremar una bandièra francesa ? Sembla talament pec per La Dépêche du Midi, que podèm assegurar que l’acte es considerat coma un acte d’un falord. Lo jornal meridional del provincialisme francés marca aital un plaçament politic clar, es aquí per èstre lo veïcul del nacionalisme francés.

Conselharai a totes los redactors e jornalistas dels jornals provincialistas en Occitània de legir lo libre de Claude Duneton –qu’es pas sovent considerat coma extremista-, es un libre que parla de la guèrra de 14-18, especialament en Lemosin (donc en Occitània), lo libre se totola «Le Monument»; es particuliarament pietadós que fosquèsse pas obligatòri de legida dins totas las escòlas de jornalismes a Tolosa, Bordèu o Niça, dins totas las escòlas d’Occitània, e dins totas las universitats.

Es un libre qu’explica una actitud d’aqueste escantilh per un ciutadan de Foish, cremar una bandièra francesa se podrà grandament justificar, sobretot del punt de vista occitana, es de dire de l’Arièja. Perqué ? Aprèp 1914, l’Arièja coma tot Occitània, es devenguda tèrra cremada per un sistèma economic francés, per un sistèma politic francés, e per un sistèma lingüistic de destruccion de la lenga occitana.

Ont serètz lo 18 de decembre de 2012 ? Pensi èstre a Foish, per sosténer un patriòta occitan, coma l’espèra pas La Dépêche dita del Midi. Lo redactor L.G. espèra protestacion de la part de las «associations patriotiques», contra aquel gèst supausadament «inédit» dins la departamentala informacion. De que pòdon pensar los Occitans que son nafrats cada jorn pel nacionalisme francés ? A cada commemoracion patriotica francesa en tèrra occitana.

Ambe aquel bilhet mandi las meunas felicitacions.

Los simbòls de la Republica son pas una religion, lo blasfeme es pas encara una règla republicana (la republica es universala) ; una lei d'aqueste escantilh es una lei contra lo pòble (aquí l'occitan), es una lei militarista, bonapartista. Vos convidi totes a manifestar lo 18 a Foish, farai lo meu possible per donar las oras de la manifestacion ; vau a Foish dins los dètz jorns que venon.

Es benlèu un delicte d’opinion e alara serai expulsat per Manuel Valls ? Quí sap ….. ont ?

Jà se ne parla en Bretanha en bais Lengadòc … mas l’informacion a pas encara capitat d’arribar a París. : lo nacionalisme francés es avugle mas pas per tot…

-°-