arcuèlh

dissabte, de gener 12, 2013

Còp de capèl al “còp d’ala”

Divendres abans la tradicionala commemoracion dels dreits comunals de Tolosa, es France 3 Tolosa-Viure al País que presentava un tròç del futur programa geografic e istoric, CÒP d’ALA. La presentacion se faguèt a l’Ostal d’Occitània, çò que sembla normal per èstre lo luòc idòni per aiçò presentar ; mas sèm pas estats pron nombroses, vist la qualitat de la presentacion.

I soi estat, convidat al darrièr moment (lo servici tolzan de comunicacion de France 3 es lent), la velha a 21h00, mas me semblava important d’anar veire lo trabalh enòrme amotlonat per l’en Amic Bedel, Piget Produccion, e la causida de Benoit Roux d’o fabricar ambe Piget. Son mai de 20 documents audiovisuals cortets (tròp cortets, me sembla), mas pron cortets per dintrar dins Viure-Al-País de France 3. France 3 prepausa un fenestron programatic en lenga occitana cada setmana, 2 setmanas sus 3 es en lenga occitana. Es malastrosament pauc sufisent per explicar que l’occitan es present a l’antena de las televisions (ne sèm ara a quasiment 20 sobre la TNT en lenga francesa) ditas regionalas.

O podèm dire encara e encara, la television en occitan a encara mestièr d’ajuda, aqueles documentaris o documentals son estats ajudats per las collectivitats territorialas ; o cal sotalinhar perqué encara recentament Jean-Luc Melénchon (Front de Gauche) a encara afortit qu’aquelas collectivitats èran pas utilas per la republica ! (pel pòble occitan sabèm pas, vist que per Jean-Luc Mélenchon existissèm pas); Es evident que fabricar de l’audiovisual en occitan dèu pas agradar als amics e a las amigas mélenchonesques… de Montpelhièr o d’endacòm mai !

IMG00490-20130111-1122

Ens Amic Bedel e Benaset Roux presentèron a l’Ostal d’Occitània lo programa CÒP d’ALA.

Es un trabalh fòl, tot i es plan organizat, es un programa amistós e grand, un “còp d’ala” bèl, mas çò que mai impressionarà son plan las presas aerianas e lo temps qu’aurà calgut per trobar lo bon moment per filmar. Aprèp los tèxtes son plan causits e rics de pedagogia e precisions. Es un programa que devendrà segur culte. Es un programa qu’ameritarà una promocion en DVD, e una venda a granda escala, per dintrar dins las bibliotècas occitanas.

Es un programa que podrà ajudar a las escòlas occitanas (en lenga occitana o ajudadas per emplegar la lenga occitana) ; cal esperar que los sobtítols franceses ajudaràn tanben una difusion en defòra del programa Viure-Al-País ; cal esperar tanben que pel DVD i aurà los sobtítols en alemand, anglés, rus, neerlandés, portugués, ongarés, etc. per una venda als toristas d’Occitània.

Occitània segur que ne sortirà un pauc mai digna, e que lo pòble occitan ne serà content de los aver en referéncia, en bibliotècas publicas e privadas.

Primièra difusion TNT  a partir del 20 de genièr 2013 dedins Vuire-Al-País lo programa de France 3.