Coma ciutadan francés de nacionalitat occitana soi concernit per la guèrra en Africa ; alara respectam las leis francesas. Mas abans de tot, soi occitan e ciutadan europèu, que regreta la manièra que los Estats europèus fan per devolopar la solidaritat (o puslèu o fan gaire). L'Estat francés emplega de personal militar sortit d'Occitània, las casernas en Occitània son un element d'Occitània, esperèm una bona annada per totes los personals d'aquestas casernas, e soi solidari ambe aqueles personals, individualament, sul terrenh de las guèrras francesas.
Lo front del Malí es un front indispensable per frenar los integrismes finançats pels extremismes autocratics d'Aràbias, e las derivas saodianas, o pels trafics de las drògas vendudas en Euròpas. Notam la paradòxa que l'argent d'aquestas autocracias arabicas es planvengut dins lo ròdol parisenc, pel fótbol o pel desvolopament economic de las tristas banlègas d'Iscla-de-França, per las gloriòlas, un standing politic (que pensan), del centralisme francés.
«L'intervencion francesa (fòra lo continent europèu) es indispensabla pels interèsses franceses » ; totes los especialistas mediatics e professionals nos l'explícan dins totes los mèdias potencials adreiçats a la populacion d'Occitània dempuèi París. Anuèch, la pujada dels interèsses dins los mèdias fan reagir lo govèrn central francés, e particularament l’en François Hollande, per explicar que l’intervencion es pas ligada amb’aiçò ; o podèm benlèu creire, mas simplament las accions passadas, istoricas, pòst-colonialistas, fan creire lo contrari.
M’agradairiá saber qu’una associacion nacionala de ciutadans per Occitània esperèsse qu'un còp de mai Occitània auriá pas de suportar las consequéncias (sempre) negativas de las intervencions militaras francesas. E zo faquèsse en public, non pas en solidaritat ams los pòbles menaçats pels integrismes religioses al Malí, mas puslèu simplament per èstre solidaris amb las populacions occitanas que son forçadas de viure ambe l’imperialisme francés, e fòra Occitània.
En gaitar las informacions de la RTE.ie (Bailà Àtha Cliath) ai après que l’en MacFaul qu’es estat salvat del site Argerian de In AMËNAS, es un nòrd irlandés … que trabalhava pel grope briton BP.
Aquesta associacion nacionala occitana coma entitat engatjada dins las libertats dels pòbles, comprendriá clarament la libertat dels Franceses d'intervenir ont vòlon, mas comprendrèm pas que los pòbles del Malís fosquèssen forçats a fargar nòvas institucions politicas que fosquèssen encara sul modèl francés. Caldriá tanben qu’aquesta associacions nacionala occitana posquèsse donar enveja a las autoritats democraticas del Malí de fargar institucions que posquèssen dins l’avenidor se protegir contra los integrismes e los banditismes de tot escantilh.
Aquesta associacion nacionala occitana recordariá a la populacion occitana del XXIen sègle, las consequéncias nefastas de l'intervencion republicana francesa en Argèria e lo sistèma nefaste establit aprèp l'independéncia de 1962. Per non pas oblidar que las riquessa europèa es fondada suls imperialismes passats (militaristas e comercials) e presents (comercials). La tecnocracia colonialista europèa, e en particular la francesa, a creat Estats en foncion de las idèas pòst colonialas de l’aprèp guèrra 39/45.
Per clavar, coma ciutadan francés d’Occitània, me sentissi pas concernit per far la guèrra en nom de fRANÇA.
-°-
Una de las consequéncias qu’èra previsibla : legir aquí. Non cal oblidar que mantunes Occitans, Bascos, Còrses, Catalans, Alsacians, Savosians, Martiniqueses, Guoadelopeans, Polinesians, etc. son los emplegats del sistèma economic francés. Es un sistèma qu’es pas pensat per els, mas que d-els lo sistèma francés n’a mestièr.
Cap comentari:
Publica un comentari a l'entrada