S’adobar ambe las diferéncias religiosas, dins una escòla de la vila de Montréal.

Dins l’Estat francés es l’acceptacion de las lengas diferentas qu’es un problèma per l’Éducation dicha Nationale, e quitament dins los modèls d’ensenhament i a un refús sistematic de l’immersion lingüistica per las lengas mesprezadas, non pas pels quadres tolzans d’Airbus çaquelà ! L’immersion lingüistica es la nòrma per la Deutsche Schule –panèus en alemand per l’orientacion dins la vila, escòla Jules Ferry a Colomiers, per respondre a una concurréncia privada dins l’aglomeracion tolzana ; dins aquestas escòlas s’i ensenha lo francés, mas pas brica l’occitan.

Al Quebèc e principalament dins la vila de Montréal, es la question religiosa qu’es pausada, per las escòlas dichas generalistas. Las entrevistas prepausadas (picatz sul ligam per las entendre) fan una diferéncia entre los òmes e las femnas, mas indica pas la religion dels entrevistats.

L’acomodament rasonable es de daissar un dròlle musulman portar un aparelh per non pas entendre las cançons dels autres escolans dins la classa devath lo pretèxte que sa religion li interdich d’escotar la musica e las cançons.

Es un pauc coma se los Franceses portávan un casc per non pas entendre parlar occitan dins la classa. N’i a que me diràn que lo cas seriá impossible, vist que jà l’ensenhament de l’occitan supòrta lo sistèma d’apartheid dins lo sistèma d’educacion d’Estat, e Calandreta es fòrabandida de costejar lo sistèma public de páur de la contaminacion (de mesclar los credons de colors) ; es justament la prepausicion d’una locutriça pel dròlle de religion particulara… l’apartheid escolar.

Nos pausèm dins un sistèma quebequés que lo francés es lenga forçada, Montreal parlariá anglés se la politica lingüistica imposava pas lo francés. Las elitas montrealesas an dròlles que se van a l’escòla anglesa e se la págan, coma la casta al poder a París.

Nos podèm pausar clarament la question d’aquesta societat que refusa los sabers de quina fòrma que fosquèssen (lenga, cançons, musica, sabers religioses, nòrmas e contra-nòrmas, istòria e non diches istorics) ; de qu’son aquestas societats ? Es una societat que prepara a la democracia ?